(வி - ம்.) தொல்புகழ் - பழமையான புகழ். காய் - வருத்துகின்ற. இலை - இலையொத்த தகட்டு வடிவம். கதிர் - ஒளி. ஈயின் - கொடுத்தால்; செயினென்னும் வாய்பாட்டு வினையெச்சம். நான்மறை - நான்கு வகைப்பட்ட தமிழ்மறைகள். ஆயும் - கற்று ஆராய்ச்சி செய்கின்ற. அந்தணர் - அழகிய தண்ணளியுடைய பெரியோர். இவர்கட்கு அத்தலத்தில் ஒன்று கொடுப்பதைக் காட்டினும் முருகப்பெருமானின் திருமுன் கொடுப்பின் அவ்வொன்றுக்குரிய பயன், கோடி இலட்சம் பங்கு மிகுதிப்பட்டு ஒருவர்க்குப் பயன்தரும்; அவ்வளவு மேன்மை, முருகப்பெருமானது திருமுன்னென ஏற்றங் கூறியவாறு. பார் முதல் என்றமையால் அதனோடு தொடர்புடைய பொன்னையும் பொருள்களையும் கொள்க.

(55)

(இ - ள்.) மலரரும்புகளையுடைய, இளஞ்சோலையை உண்டாக்கி யோரும் நந்தவனங்களையும் மணம்நிறைந்த மரக்காடுகளையும் புதிதாக உண்டாக்கியோரும் அழகு பொலிகின்ற தீர்த்தத்தடாகங்களை வெட்டி உண்டாக்கியோரும், ஆகிய இவர்கள் கந்தருலகத்து எக்காலத்தும் வாழ்பவராவர்.

(வி - ம்.) அருப்பு - அரும்பு. இளம் பொழில் - இளமரங்களை யுடைய சோலை. வனம் - காடு; பல்வகை மரங்கள் நெருங்கிய காடு. தொடுநர் - தோண்டினவர், வெட்டி உண்டாக்கியோர். கந்த உலகம் - முருகப்பெருமானுக்குரிய உயர்ந்த இன்பவுலகம்.

(56)

(இ - ள்.) இத்திருத்தணிகைக்கண் நறும்புகை யெவ்விடத்தும் கமழும்படி கூட்டுகின்றோம், விரும்புகின்ற அரிய பல்வகை விளக்குகளை மிகுதியாக ஏற்றுவோரும், மாலைகளைத் தொங்கும்படி செய்வோரும் ஆகிய இத்தகைய அறம்பல செய்வோர் ஆறு திருமுகங்களையுடைய முருகப்பெருமானுக்குரிய பாதுகாப்பு வாய்ந்த கந்தவுலகத்தே சார்ந்திருக்கும் தன்மையராவர்.

(வி - ம்.) தூமம் - நறும்புகை. "நறும்புகை யெடுத்துக் குறிஞ்சி பாடி" என்பர் ஆசிரியர் நக்கீரனார். தொகுத்தல் - நிறைவித்தல். காமம் அரும் - காமரும் என நிலைமொழி கடைக்குறைந்து புணர்ந்தது. தீபம் - விளக்கு. இறைவன் திருக்கோயிலுக்கு நறும்புகை புகைத்தலும் விளக்குகள் பல ஏற்றுவித்தலும், மாலைகளை நாற்புறங்களிலும் கட்டித் தொங்கவிடுதலும் இறைவனுக்கு உவப்புறச் செய்யும் அருந்தொண்டுகளாகும். ஆகலான், அவர் ஆறுமுகக் கடவுளின்
திருவுலகத்தன்றி