(இ - ள்.) எண்ணிறந்த பிறப்புக்களைத் தேடித்தருகின்ற காழ்த்த மலத்தாலாகிய செருக்கை அழித்து எள்ளில் நெய் போன்று எப்பொருளிடத்தும் பிரிவின்றிக் கலந்துறைந்த நின் திருவடிகளை அடியேன் பொருந்தும்படி மெய்யாகிய ஞானத்தை இப்பொழுதே வழங்கியருளி மேலும் தமிழாகிய இனிய மொழியறிவும் இனிதே தந்தருள்க ! என்று வேண்டிப் பின்னர் (பின்வரும்) இதனையும்
வேண்டுவான்.

(வி - ம்.) கணித்தல் - எண்ணுதல். பவம் - பிறப்பு. காழ்மலம், வினைத்தொகை. செருக்கு - யான் எனது என்னும் இருவகைப் பற்றுகள். தவிர்ந்த - தங்கிய. எள் + நெய் =எண்ணெய்.

(144)

(இ - ள்.) வராகபுரம் என்னும் திருப்பதியின்கண் அடியேன் நிறுத்தித் தொழுத திருவருட்குறியின்கண் வீற்றிருந் தருள்கின்ற பாம்பணிந்த திருச்சடையையுடைய எம்பெருமானை விரும்பித் தைத்திங்களிலே நிகழும் பூசநாளிலே கலந்த அன்பினோடும் சிவாகமவிதிப்படி பூசனை செய்பவர் உலகம் வியக்கும்படி தமது தீவினையெல்லாம் கழியப் பெற்று வீடுபெறுவாராக.

(வி - ம்.) அருட்குறி - சிவலிங்கம். அராவணி சடையினான் - சிவபெருமான். அமர்தல் - விரும்புதல். செயலில் விராவிய அன்பென்க. அன்பு ஈண்டு இறைவன்பால் நிகழும் அன்பு ; பக்தி. தராதலம் - ஆகுபெயர், உலகிலுள்ள சான்றோர் என்க. அருங்கதி - வீடுபேறு.

(145)

(இ - ள்.) எம்பெருமானே ! எளியேனுக்கு நீ காட்சி நல்கியருளிய இந்த நன்னாள் புரட்டாசித் திங்களிலே திருவோணம் மருவிய மாண்புடையதாகும். அத்தகைய இந்நன்னாள் ஆண்டுதொறும் வந்தெய்தும் பொழுது இத்திருப்பதியின்கண் எளியேன் பெயராலே நிலைபெற்றுள்ள இவ்வகத்திய தீர்த்தத்திலே எய்தி நீராடி நின்னையும் கண்டு தொழுபவர் அநாதியாய்த் தம்பாற் செறிந்த மலங்கள் அனைத்தும் கழியப் பெற்று நின்னுடைய திருவருள் நீழலிலே சேர்ந்தின்புறுவாராக.