(இ - ள்.) இவ்வாற்றான், பிறப்பினுள் வைத்து உயர்ந்த மக்கட் பிறப்பை எய்தி நிறைந்த அகவையுடையராய் இருத்தல் மிக அரிதேயாகும். மக்களுள்ளும் நல்ல குலத்திற் பிறத்தல் பின்னுமரிதே யாகும். நற்குலத்துப் பிறந்தாலும் அறவோராக இருத்தல் மிகவும் அரிதாகும். அறவோராயவிடத்தும் வேதாகமங்களை ஓதி ஆராய்ந்துணர்ந்து முக்கட் கடவுளை வழிபட்டு அவன் திருவடிநீழலிலே கலத்தல் மிகமிக அரிய செயலாகும். அதற்கேற்ற சிறந்த குலத்திலே பிறந்திருந்தும் வீணாக மாந்தர் இறந்துபடுகின்றனர். என்னே! இவர்தம் அறிவிருந்தவாறு!

(291)

(இ - ள்.) "பாங்கருஞ் சிறப்பின் பல்லாற்றானும் நில்லாவுலகம்" என்னும் மெய்ம்மையை ஐயந்திரிபற வுணர்ந்து ஒருசிலரே ஊழானே தமக்கெய்திய உடல் பொருள் முதலியவற்றைக் கொண்டு கெடாத மெய்ப்பொருளாகிய திருவருளை இவ்வுலகத்திலே தேடாநிற்பப் பற்பலர், அதனைக் கண்டிருந்தும், அரும்பனைய மென்முலை மடவார் முதலிய பொய்ப்பொருண்கண் மேல் வேதநெறியினின்றும் மாறுபட்டுச் செல்லாநின்ற அலைபோன்ற தம் அவாவினைத் துவரக் கெடுத்து உய்ந்து போதலை நினைகின்றிலர். என்னே இவர்தம் அறிவிருந்தவாறு.

(வி - ம்.) நிலையாமை காட்சியளவைக்கே நன்கு புலப்படுவதாயிருந்தும் என்பார் 'கண்டு' என்றார். ஊக்கத்தாற் றிருவருளை ஈட்ட என்க. முகிழ்முலை - வினைத்தொகையுமாம். ஒன்றன்பின் னொன்றாக வருதலின் அலையான ஆர்வம் என்றார்.

(292)

(இ - ள்.) பிரமனும் திருமாலும் உருத்திரனும் ஆகிய முத்தேவரை யுள்ளிட்ட தேவர்களும் தமக்கெய்திய வானுலகுதரும் பேரின்பத்தை வெறுத்து உயிர்கட்கருளுஞ் செயலிலே பித்தேறிநின்ற முழுமுதலின் திருவடிகளைப் பெருகிய அன்போடு பணிதற்கிடமான அத்தகைய மாண்புடைய இப்பாரத நாட்டின்கண் முற்செய்தவமுண்மையால் எளிமையாகவே மக்கள் வாழ்வு தம்மை எய்தியிருப்பவும் அந்தோ மாந்தர்பலர்