(இ - ள்.) இந்திரன் (வலது) தோளிலே வாதநோயுடையன். வளவிய திங்கட்டேவன் குட்டநோயுடையான். சுழல்தற்குக் காரணமான வெப்புநோயானே தக்கன் பிணிக்கப்பட்டான். வலியையுடைய சனிக்கடவுளும் உலாவுதற்குரிய கால்களில்லாத முடவன். தண்ணிய கடற் கரசனாகிய வருணன் நீர்க்கோவை நோயுடையான்.

(வி - ம்.) வலாரி - இந்திரன். கயம் - க்ஷயம். மந்தன் - சனி. சலோதரம் - நீரிழிவுமாம். மாது, ஓ : அசைகள்.

(315)

(இ - ள்.) திருமால் தலைநோயுடையன், ஞாயிற்றுத்தேவன் பழுதுபட்ட தோலையுடையன் ஆயினன். பிரமதேவன் வளவிய தலையொன்றனை இழந்தனன். கலைமகள் மூக்கரியுண்டாள்; உளஞ்சுழலும் படி காமன் உடல்வெந்து போயினன். கொல்லும் வலிமிக்க கூற்று வன்றானும் கொல்லப்பட்டான். தக்கனுடைய வேள்விக்களத்திலே உளரான அமரரெல்லாம் அத்தக்கனோடு உறுப்புக்களை இழந்தனர்.

(வி - ம்.) துளவினன் - திருமால். போதன் - பிரமன். அளமரல் - அலமரல்; சுழலல் அவிக்களத்தில் உளர் யாரும் எனமாறுக.

(316)

(இ - ள்.) காண்டற் கினிய தகுதியையுடைய திருமாலும் கழுத்துத் துணிபட்டு நிலத்திலே வீழ்ந்தான். முப்புரங்களிலே வாழ்ந்த அசுரர் அனைவரும் ஒரே கணையில் மாண்டனர். இறைவி சினத்தலானே நெடிய தாருகன் இறந்துபட்டான். ஒப்பற்ற சூரபதுமனும் யாம் எறிந்த எமது வேற்படையானே தோற்று உடல் நீத்தனன்.

(வி - ம்.) விண்டு - திருமால். முப்புரம் - ஆகுபெயர். சூரன் - சூரபதுமன். யாம் தூண்டிய எமது வேலால் என்க.

(317)