(வி - ம்.) எரியுறுநீர் - வெந்நீர். மண் - புற்றுமண். ஏய்த்து - இயைத்து. உணக்கல் - வியங்கோள். பதினொருமனு - பஞ்சசடங்கங்கள். அரண் - பாதுகாவல். அழனீர் - வெந்நீர். வரண்டுதல் - வரன்றுதல். பதிதர் - தீவினையாளர். அறல் - நீர். வழங்குக : வழங்குங்கால் அறல் படிந்தும் வழங்குக என்க.

(392)

(இ - ள்.) ஒருவர் ஒரு தெருவின்கண் இறந்துவிட்டால் இறந்த வீட்டின் முகடு பொருந்தியிருந்தால் ஐம்பது தண்டுதொலை வழக்குண்டாகும். முகடொன்றா திடையற்றிருப்பின் முப்பதுதண்டு தொலை வழுக்காம். பக்கத்துத் தெருவாயின் வழுக்கில்லை. திருக்கோயிலுக்குப் பக்கத்துத் தெருவாயின் முப்பதுதண்டு தொலை வழுக்காம். வழுக்குண்டாயின் பிணமெடுக்குமுன் வேதமோதுதல் முதலிய தொடங்கற்க. இனி, பார்ப்பனர்க்கு இறந்துழியும் பிறந்துழியும் பத்துநாள் வழுக்காம். அரசர்க்குப் பன்னிரண்டுநாள், வணிகர்க்குப் பதினாறுநாள், ஆகமவொழுக்கமுடைய வேளாளர்க்குப் பதினைந்துநாள், ஆகமவொழுக்கமில்லாத வேளாளர்க்கு முப்பதுநாள் வழுக்குண்டாம்.

(வி - ம்.) வழுக்கு - வாலாமை; தீட்டு. தண்டு - ஓரளவு, நான்குமுழம். முகடு - வீட்டின்முகடு. தொடங்கல் - வியங்கோள்.

(393)

(இ - ள்.) தன் புதல்வி, தன்னுடன் பிறந்தாள், தாய், தாயுடன் பிறந்த மாமன் முதலியவர் இறந்துழியும், மூன்றுநாள் வழுக்காம். மற்றையோர் இறந்துழி நீராடுந்துணையும் வழுக்காம். இறைவன் திருவடியிற் கலக்குந் தகுதியுடைய ஞானியர் மறைந்துழி வழுக்கில்லை.