(இ - ள்.) குதிரை எருது கூலம் நிலம் அரிதாரம் செவ்விய பொன் என்னும் இவற்றை விரும்பித் தானமாக ஏற்றவன் திருக்கோயிலிலிருந்து பதினாயிரமுறை அகோரங் கணித்திடுக. விரித்தல் செய்யும் கம்பளம் பஞ்சு எண்ணெய் பால் தயிர் நெய் என்னுமிவற்றை விரும்பித் தானமேற்பின் முந்நூறுமுறை கணித்திடுக. திருமடத்தைத் தானமேற்பின் நூறாயிரமுறை அகோரங் கணித்திடுக. தீவினை தீர்தற்பொருட்டு ஒருவன் வழங்குஞ் சோற்றினை ஒருவன் தன் வாழ்நாள் முழுதும் ஏற்றல் ஒழிக. சிலநாள் மட்டும் ஏற்றுக்கொள்க. சோறேற்கும் பொழுது அதனையும் சிவனடியார் ஆசிரியன் முதலியோரைக் கூட்டிக்கொண்டு உண்ணுக. அவர்களைக் கூட்டி உண்ணலில் ஒருநாள் தப்பின் நூற்றெட்டுமுறை அகோரம் கணித்திடுக.

(வி - ம்.) பரி - குதிரை. விடை - எருது. வெஃகின் - விரும்பிக் கொள்ளின். கரைதல் - கரைக. கடைபோக - ஆயுள்முடியுங் காறும். அரனடியார் என
ஒட்டுக.

(426)

(இ - ள்.) நோயுடையனவும், கிழம்பட்டனவும், ஈனாதனவும் கருக்கொண்டுள்ளனவும், கருமுதிரப்பெற்றனவும், இளங்கன்றுடையனவும், கன்று சாகப்பட்டனவும், மலமுண்ணும் இயல்புடையனவும் என்னும் இவை ஒழிந்த ஏனைய ஆக்கள் தேவதேவனாகிய இறைவனுக்கு ஆட்டுதற்குரிய ஆனைந்தும் அளிப்பதற்குத் தகுதியுடையனவாகும். சூழாநின்ற புகைபோன்ற நிறமும், நீலநிறமும், செந்நிறமும், வெண்ணிறமும் அரிய கபிலநிறமும் என்னும் இந்த நிறமுடைய ஆன்களுடைய சாணகம் நீர் பால் தயிர் நெய் என்னும் இவ்வைந்தனுள்