(வி - ம்.) பளிங்குவரை - படிகமலை. மயிர் - தாடிமயிர். உதக்குத் திசை - வடதிசை. தெரிவை - உமை.

(434)

(இ - ள்.) கொன்றை மலரும், பிறையும், சடையும், பதினைந்து திருவிழிகளும், வலக்கைகள் ஐந்தினும் வேலும், அபயமும், சூலமும், கட்டங்கமும், இசையை முடுக்காநின்ற துடியும், இடக்கைகள் ஐந்தினும் வரதமும், சுவைமிக்க மாதுளமும், பாம்பும், செபமாலையும், நீலமலரும் உடையராய், இங்ஙனம் அறிஞரால் தொடர்புபடுத்துக் கூறப்பட்ட இலக்கணமமைந்த முப்பத்திரண்டு உறுப்பும், பதினாறாண்டகவையும், பளிங்குபோன்ற திருமேனியும் உடையராய்த் திகழாநின்றவரும், ஒளி பொருந்திய சதாசிவ தத்துவமாகிய இருக்கையின்கண் எழுந்தருளியிருப்பவருமாகிய எம்பெருமானுடைய தாமரை மலர்போன்ற திருவடிகளைப் பாவனைசெய்து தொழ மிகப்பழைய வினைகளும் கெட்டொழியும்.

(வி - ம்.) கடுக்கை - கொன்றை. சடிலம் - சடை. தாடிமம் - மாதுளை. உற்பலம் - நீலோற்பலம்.

(435)

(இ - ள்.) ஐந்து மூர்த்திகட்கும் திருமேனி அவ்வம் மூர்த்தியின் மலர்ந்த முகத்தின் நிறமேயாம். விழியும் மும்மூன்றே. ஐந்து மூர்த்திக்கும் வலப்பகுதிக் கையில் விளங்கும் முத்தலைச் சூலமும், வரதமும் இடப்பக்கத்துக் கையில் கண்மணிமாலையும், அபயமும் உள. திலகமும், வளவிய தோடும் முகிலொத்த கூந்தலும் உடையராய் உமையம்மையார் திருமுகம் போன்று முகமுடையராயிருந்த வாமதேவரை ஒழிந்த ஏனை நால்வருக்கும் சடையும், அரவமும், பிறையும் உள முற்கூறிய படைக்கலன்களை அகோரமூர்த்தி தம் மெட்டுக் கைகளினும் பற்றியிருப்பர். அம்மூர்த்தியை நினைப்பவர்க்குத் தீவினை ஒரு சிறிதும் உளதாகாது.