(இ - ள்.) சாகத்தீவு முதலிய ஐந்து தீவுகளும் ஒவ்வொன்றும் ஏழேழ் பெரிய மலைகளையுடையனவாம். இனி, புட்கரணித் தீவு தன்பால் மிகவுயர்ந்த சக்கரவாளகிரி போன்று இடைவிடாமல் வலமாகச் சூழ்ந்திருக்கும் மானதகிரி என்னும் மலையையும் உடைத்தாம். சென்று திரியும் அம்மலையின்மேல் திக்குப்பாலகர் எண்மரும் சூழ்ந்து தத்தமக்குரிய திசைகளிலே வீற்றிருப்பர். சாகத்தீவு முதலிய அந்த ஆறிடங்களினும் வாழ்பவர் பிணி மூப்பு இல்லாதவர்களாய் எக்காலத்தும் இன்பமுற்றிருப்பர் இவர்க்கு வாழ்நாள் பதினாயிரமாண்டென்ப.

(வி - ம்.) போகுயர் - மிகவுயர்ந்த என்க. மாகர் - திக்குப்பாலகர். வதிவர் - உறைவர். பிணி மூப்பு எகியவர் என்க.

(472)

(இ - ள்.) இந்த ஏழுகடல்களுக்கும் அப்பால் பத்துக்கோடி யோசனை யளவிற்றாகப் பொன்னிலமிருக்கும் என்ப. இப்பொன்னிலத்தே தேவர்கள் உறைவர். அதற்கப்பால் நிலவுலகமனைத்தையும் வளைந்துள்ள சிவந்த மணிநிறமுடைய சக்கரவாளகிரி பதினாயிரம் யோசனை அளவுடைத்து. அதற்கப்பால் இருளுலகம் முப்பத்தைந்து கோடியே பத்தொன்பது நூறாயிரத்து நாற்பதினாயிரம் யோசனை அளவிற்றென்ப. அதற்கப்பால் கொழுவிய மணிபோன்ற நீரையுடைய பெரும்புறக் கடல் உளது. அதன் அளவு, ஒருகோடியே இருபத்தேழு நூறாயிர யோசனை என்ப.

(வி - ம்.) முதுவரை - ஈண்டுச் சக்கர வாளம்.

(473)