(இ - ள்.) மொய்த்த பேரொளி திகழும் சக்கரவாளகிரியின் முன்புறத்தில் இயக்கரும் அரக்கரும் வெவ்விய பிசாசர்கணமும் உறையா நிற்பர். எட்டுத்திசைகளினும் திக்குப்பாலகர் எண்மரும் உறைவர். மைபோன்ற காரிருள் மூடப்பட்ட அந்த மலையின் மற்றொருபுறத்தே தம்மைத் தாமே கொலை செய்து கொண்டோரும் புன்மைக் குணமுடைய தீவினையாளரும் இன்னோரன்ன பலரும் உறையாநிற்பர்.

(வி - ம்.) மொய்யொளி : வினைத்தொகை. மையிருள் - உவமத் தொகை. காழகம் - கறுப்பு; வெகுளி.

(474)

(இ - ள்.) பெரும்புறக் கடலுக்கு அப்பாலமைந்த அண்டச் சுவரோடு முதல் பொன்மலை வரையில் பெரிய நிலவுலகிற்கியன்ற ஐம்பதுகோடி யோசனை தூரத்தினையும், ஈண்டு வகுத்துக் கூறினேம். இனி வானத்தின் உயரத்தையும் வகுத்துக் கூறுவேம் கேட்பாயாக. இந்நிலவுலகத்திற்குமேல் பெரிய புவலோகம் பதினைந்து நூறாயிர யோசனை யென்ப. அப்பால் ஞாயிற்றுலகம் நூறாயிர யோசனை என்ப. அப்பால் திங்கள் உலகம் நூறாயிர யோசனை என்ப. அப்பால், விண்மீன் உலகம் நூறாயிர யோசனை; அப்பால் புதனுலகம், இருநூறாயிர யோசனையில் உளதென்ப.

(வி - ம்.) என்றூழ் - ஞாயிறு. பனிக்கதிர் - திங்கள்.

(475)

(இ - ள்.) இனி அப்பால் மேலே வெள்ளியுலகமும் விளங்குகின்ற செவ்வாயுலகமும், வியாழனுலகமும், சனியுலகமும் தனித்தனி இருநூறாயிரம் இருநூறாயிரம் யோசனை தூரத்தே உளவாம்; காழ்ப்பில்லாத