(இ - ள்.) இத்தகைய மாண்புடையோர் புறமெலாம் சூழாநிற்ப ஆயிரக்கால்மண்டபத்தில் வலிமைமிக்க அரிமானுருவமைந்த பசியமணி யழுத்திய அணையின்கண், பரசும் மானும் இருகையினுந் தாங்கித் தம்மைச் சார்கின்ற மெய்யடியாருடைய மிக்க அச்சத்தை அகற்றி வரமளிப்பனவாக இரண்டு திருக்கைகளை யமைத்து, வீழிக்கனி போன்று சிவந்த திருவாயும் முத்துப்போன்ற பற்களும் உடைய உமையம்மையாரோடு வீற்றிருந்த முழுமுதல்வனாராகிய சிவபெருமான்
திருமுன்னர்.

(வி - ம்.) எறுழ் - வலிமை. வீழி - ஒருசெடி. அதன்கனிக்கு ஆகுபெயர்.

(485)

(இ - ள்.) அழகினையுடைய விடை அமர்ந்திருக்கும். அவ்விடையின் பக்கத்தே செந்நிறமுடைய சுமனையும், வெள்ளையாகிய அழகிய நிறமுடைய சுரபியும், கபிலநிறமுடைய நந்தையும், கரியநிறமுடைய சுபத்திரையும், பொருந்திய புகைபோன்ற நிறமுடைய சுசீலையும், என்னும் ஐந்து கடவுளான்களும் இனிதே அமர்ந்திருக்கும். ஈண்டுக் கூறப்பட்ட ஆன்களின் முகத்திலே தோன்றும் கொம்பின் அடிப்பகுதியிலே மலரோனும் திருமாலும் பொருந்தி உறையாநிற்பர்.

(வி - ம்.) சுந்தரம் - அழகு. விடை - எருது; ஈண்டு நந்திதேவர் கபிலம் - ஒருநிறம். தூமம் - புகை. நந்தும் - உவமவுருபு.

(486)

(இ - ள்.) அக்கொம்பின் நுனிப் பகுதியில் இயங்கியற் பொருளும் நிலையியற் பொருளும் ஆகிய உலகமும், பல்வேறுவகைத் தீர்த்தங்களும் பொருந்தியிருக்கும், தலையிற் சிவபெருமானும், நெற்றியின்கண் இறைவியும், நாசியின்மேல் கூர்த்த வேற்படையை எறியும் இளைய பிள்ளையாரும், நாசியினுள் வானவர் தலைவரும், உதடுகளில் உதய அத்தமனங்கட்குரிய தெய்வங்களும், பல்லின்கண் ஓசையுடைய காற்றும், கண்களில் ஞாயிறுந்திங்களும், செவியிரண்டினும் அசுவினி தேவரும், நாவில் வருணனும்.