கந்தர்கலிவெண்பாவா னுணர்க. இதனாற் சிவபெருமானுக்கும் அறுமுகமுளவாதல் காண்க. ஞெமிர்ந்தன - பரந்தன. இதனை, 'பாய்தலும் ஞெமிர்தலும் பரத்தற் பொருள' என்னுந் தொல்காப்பியச் சூத்திரத்தா னுணர்க. சுலாவல் - சுழலல்.

(20)

(இ - ள்.) மூன்று கண்களையுடைய சிவபெருமான் (அச்சுடர்கள்) தன் முன்னர்வரும் வண்ணம் நினைக்க வந்தபின்னர் அவ்வொள்ளிய தீப்பொறிகளைக் கொடுத்த வளவில் காற்றுத்தேவன் சுமந்து அக்கினியின்கட் கொடுப்ப அவ்வங்கியங் கடவுள் கங்கையின்கட் செலுத்தக் கங்கை நதியானது தகுதியமைந்த சரவணப் பொய்கையிற் சேர்க்க என்னை யடிமைகொண்ட முருகப்பெருமான் மகிழ்ச்சியுற்றுக் கார்த்திகைப் பெண்கள் மாட்டுப் பாலுண்டு எழுந்தருளியிருந்தனன்.

(வி - ம்.) நினைந்து - நினைக்க : எச்சத்திரிபு. கால் - காற்று. அறு மாதர் - கார்த்திகை மகளிர்.

(21)

(இ - ள்.) ஒலிக்கின்ற மேகலையையணிந்த உமையம்மையார் அவ் வங்கிக்குப் பயந்து காலணி யொன்றோடொன்று மோதுதலால் (அம் மேகலையின்கட்) சேர்ந்த இரத்தினக் கற்கள் சிந்துவண்ணம் ஓடி நம்பாற் குமரன் றோன்றாவண்ணம் தேவர்கள் செய்த சூழ்ச்சியால் இங்ஙனமாயதெனத் தேவர்கண் மாட்டுச் சீற்றங்கொண்டு நன்மை யுண்டாவதற் கேதுவாகிய கருப்பத்தைத் தெய்வமங்கையர் அடையற்க வென்று சாபமிட்டுச்சென்று தலைக்கோலமானது திருவடியின்கண்ணே பொருந்த வணங்கி இறைவன் பாகத்தின்கண்ணே பொருந்தி யிருந்தன ளென்க.

(வி - ம்.) இலம்பகம் - தலைக்கோலம். இதனை "அரங்கணி நாடக மகளி ராய்நுதற், சுரும்புசூ ழிலம்பகத் தோற்றம் ஒத்ததே" என்னும் சிந்தாமணி - கேமசரி இலம்பகம் 31ஆவது செய்யுளடியானு முரையானு முணர்க.

(22)