(இ - ள்.) கடலின்கண்ணே இலங்கைத்தீவான தழுந்த அப்பொழுதெழுந்த அதிவீர னென்பானுயிரை யுண்டு சென்று, சூரன் நகரமாகிய வீரமகேந்திரத்தின்கட் சென்று அந்நகர் வாயிலைக் காவல்செய்து தங்கிய வலியுடைய பருத்த தோளினையும், யானைமுகத்தினையுமுடைய பாதகனைக் கொன்று அப்பட்டினத்துச் சென்று நீங்குதற்கரிய சிறையின்கண் தங்கும் இந்திரன் மகனாகிய சயந்த னென்பான் மனத்தினைத் தெருளுறச் செய்து சூரனாகிய முதல்வ னவைக்கட் சென்றன னென்க.

(வி - ம்.) அதிவீரன் - ஓர் அசுரன். வாழிய : அசை. பதகன் - தீவினையாளன். சயந்தன் - இந்திரன் மகன்.

(130)

(இ - ள்.) எவ் வெத்தன்மை யுடையாராகிய பெரியாரவைக் களனும் பொலிவழியப் பொலிவுற்ற தனக்கிணையில்லாச் சூரன் வேறொருவர்க்கில்லாத சிறப்புடன் எழுந்தருளியிருந்த அந்த அவைக் களமும் அவன் தவிசினொளியு மவனழகும் மழுங்க நீதியினையுடைய குமரனருளின் ஓர் தவிசானது பொருந்தச் சென்று அவ்விடத்திருந்தனன். எல்லா வன்மையுங் கொண்ட சூரன் தீயுண்டாக விழித்துச் சிறுவனே நீயார் என்று கேட்கச் சொல்வான் என்க.

(வி - ம்.) தவ்வென - பொலிவழியா. தெவ்விய - கைக்கொண்ட.

(131)