(இ - ள்.) ஆதலானே தேவர்களை நீங்குதற்கரிய சிறையினின்றும் நீக்கி இன்பினை அடையக் கடவையென்று சொல்லி ஈங்கு வருக, என்று செலுத்தினானென்று சொல்ல, சூரனுளத்தின்கட் பொங்கிய சீற்றமானது, மேலே தோன்ற மிக்க அறிவினை! ஆயிரத்தெட் டண்டங்களையுமாளும் எனக்குச் செவியறிவுறுத்தலான் நுந்தலைவன் வடிவானே யன்றி அறிவானும் இளையான்போலும். இங்குநின்றுந் தப்பியோடிய தேவர்கட்கும், துன்பினைப் பெரிதும் சேர்ப்பவனாகிய யான் சிறையகத்துள்ளோரை விடுவனோ என்றான்.

(வி - ம்.) சீத்து - கெடுத்து. மதி - முன்னிலையசை. உம்மை -
எச்சவும்மை.

(134)

(இ - ள்.) என் றம்பியாகிய தாரகனைப்போல என்னையும் வலியில னென்று கருதி உன்னைத் தூதுவனாக விடுத்த இளையோனாகிய அம்முருகன், தம்பியை இழந்த என்னைப்போல வருந்த அவன் தம்பியாகிய உன்னை எம்பி இறந்தாற்போல இறக்கும்வண்ணஞ் செய்வேன். தூதுவனைக் கோறல் தரும மல்லவென்று தாழ்த்திருந்தேன். வேலினைக் கையிலுடைய முருகனை என் தம்பியாகிய தாரகன் சென்ற வீரசுவர்க்கத்திற்கு நென்னலே செலுத்தி யிருப்பேன். (இளைஞரைக் கோறல்) வீரர்களுக்கு வீரமல்ல வென்று கருதி அழகிய உலகின்கண் ணுள்ளார் வியப்ப எனக்கிளைய சிறுவர்களால் வெல்லுதலை விரும்பியுள்ளேன். நீ செல்வாயாக என்று கூறினான்.

(வி - ம்.) இளையவன் - முருகன். உயங்க - வருந்த. என் தம்பியைப்போல இறக்கும்படி செய்வேன் என்றவாறு. வேற்கைநம்பி - முருகன். தம்பியை : முன்னிலைப் படர்க்கை.

(135)