(வி - ம்.) கோல் - அம்பு. நீல் - நீலநிறம். நெற்றி - முன்னணி.

(549)

(இ - ள்.) உலகம் இடையறாது இயங்குதலான், இவ்வியக்கத்தைச் செய்யும் காரணன் ஒருவனும் மலமுதலியனவும் இருத்தல் ஒருதலை என்று கருதலளவையாற் றுணிதல்போன்று, சூரபதுமனும் ஆறுமுகப் பெருமானுமாகிய இருவரும் விடுகின்ற கணைகள் யாண்டும் திரிவதனாலே பொருந்திநின்று பெரிய போரினை விளைப்போர் உளர்என்று கருத லளவையாற் றெளிதலன்றி அவ்விருவருடைய விளக்கமுடைய உருவத்தையும் அவர் ஆற்றும் போர்ச் செயலையும் அமரர் முதலிய யாவரும் காட்சி யளவையாற் கண்டிலர்.

(வி - ம்.) உலகுறுகாரியம் - உலகம் எய்துகின்ற தொழிற்பாடு. உதனுக்கு - இதற்கு. மதித்திடல் - கருதித்தெளிதல். சமர் - போர்.

(550)

(இ - ள்.) மழு, கப்பணம், சக்கரம், கொழு, வச்சிரம், வேல், தண்டு, நெடிய எழு, சூலம் என்னும் இவையும் இன்னோரன்ன பிறவுமாகிய படைக்கலங்கள். எண்ணிறந்தவற்றை இடையிடையே கலந்து அச்சூரபதுமன் செலுத்திக் கடவ இப்படைக்கலங்கள் அனைத்தையும் முதல்வனாகிய பெருமான், சிறந்த கணைகளாலேயே அழித்து மேலும் விரைந்து சுழலாநின்ற அந்தச் சூரபதுமன் தேரோடு குதிரைகளும் பெரிய நிலத்திலே வீழும்படி அழித்து மூன்றுலகோரும் புகழும்படி வீழ்த்தியருளினன்.

(வி - ம்.) அனந்தம் - எண்ணிறந்த; முழுமையுடையபுவி என்க. முன்னவன் - முருகன்.

(551)

(இ - ள்.) தேர் இங்ஙனம் அழிதலானே அவுணர் வேந்தன் வில்லோடு வறுநிலத்தே நின்று கணைகளை நிரம்பத் தொடுத்தேவினன். எம்பெருமானும் அவனெதிர்சென்று அவையிற்றை அழித்து மேலும்