(இ - ள்.) அச்சத்தானே சிறகுகளடர்ந்த பறவைகளாய் மாறி விளங்கிய அமரர்களை எம்பெருமான் முன்னைய உருவங்கொள்ளும்படி அருள்புரிந்தனன். முன்னர்ப் பறவைகளாகி ஓடிஒளித்த தேவரனைவரும் தம்முருவுடன் வெளிப்பட்டு மணமுடைய மலர்மாரி பொழிந்து எம் பெருமானுடைய, செந்தாமரைமலர் போன்ற திருவடிகளை வாழ்த்தி வணங்கிப் பெருமகிழ்ச்சிகொண்டு பொலிவுற்றனர்.

(வி - ம்.) மண்டிய - அடர்ந்த. புலவர் - தேவர். பறப்பை - பறவை. விண்டனர் - முற்றெச்சம். விரை - மணம். புண்டரீகம் - தாமரை.

(604)

(இ - ள்.) சூரபதுமனோடு ஆற்றியபோரின்கண் மாண்டபூதர்களை உயிர்ப்பித்தருளித் தீமையுடைய சூரபதுமன் பண்டுகவர்ந்துகொண்ட தேவருடைய பழமையான செல்வங்களைத் தனது திருமுன்னர்க் கொணர்வித்துப் பின்னர் வீரவாகுவினாலே சிறைக்கோட்டத்தே வதிந்த சயந்தன் முதலியோரை விடுவித்துப் பின்னர் வருணனைநோக்கி.

(வி - ம்.) சூரன் - சூரபதுமன் சயந்தன். - இந்திரன்மகன். காவல் - சிறை. நீரிறை - வருணன்.

(605)

(இ - ள்.) சூரபதுமனுடைய நகரமான மகேந்திரத்தை அழிக்கும் படி பணித்துக் கருடக்கொடியை மிகவும் உயர்த்திய திருமால் முதலிய தேவரோடு அவணின்றும் புறப்பட்டுக் காற்றினும் விரைந்துசெல்லும் விரிந்த சிறகினையுடைய மயிலைச்செலுத்தி உலகெலாம் வாழ்த்தும் எம்பெருமான் ஒப்பற்ற திருச்செந்திலை எய்தினன்.

(வி - ம்.) அவுணர்கோன் - சூரபதுமன். உவணம் - கருடக்கொடி. உம்பர் - தேவர். பவனம் - காற்று.

(606)