(இ - ள்.) இவ்வாறு நாடோறும் மூன்றுபொழுதினும் வழிபாட்டுத்திருப்பணி புரிந்துவருங்கால், கார்த்திகைத்திங்களின்கண் மாரன்நாள்கூடி விளங்காநின்ற பூரணையிலே முருகப்பெருமான் அழகுமிக அவ்விந்திரன் முன்னர் எழுந்தருளினன். அவ்விந்திரன் பேரன்பு பொங்க மெல்லிய கற்பகமரத்தின் மலர்த்திரளை அப்பெருமானுடைய திருவடிகளிலே தூவித்தொழுது வாழ்த்தினன்.

(வி - ம்.) விருச்சிகம் - விருச்சிக ராசி. விசாகனார் - முருகன்.

(18)

(இ - ள்.) அருண்மழையைப் பொழிகின்ற ஆறுதிருமுகங்களும் போற்றி! மலர்ந்த பன்னிரு திருவிழித்தாமரைகளும் போற்றி! மணமுடைய குவளை மலர்மாலை பொலிவுற்ற மலையை ஒத்த திருத்தோள்கள் போற்றி! பெரிய வரங்களை அடியார்க்கருளுதற்கு நீளாநின்ற அழகிய கைகள் போற்றி! மயக்கத்தால் வரும் இருவினையையும் துகைத்தலானே சிவந்த மலர்போன்ற திருவடிகள் போற்றி!

(வி - ம்.) போற்றி - காத்தருள்க என்னும் பொருள்படுமொரு சொல். வணக்கம் எனினுமாம்.

(19)

(இ - ள்.) இயல்பாகவே நீ பேரருள் உடையை என்னுமியல்பினை உலகினர் தெளிந்து கொள்ளும்படி கூர்த்த ஆணவமலத்திலே முழுகிப் பிறப்பிறப்புகளிலே சுழலாநின்ற பொய்யனாகிய எளியேனுக்கும் நினது சிறந்த அருளைப் புரிந்து தேவருடைய சிறையினை அகற்றிப்பாதுகாத்த நிரம்பிய அருள்போற்றி ; அவ்வருட்கு ஆறாயிரமுறை போற்றி ! போற்றி!

(வி - ம்.) பெற்றிமை - தன்மை. தெள்ள - தெளிய. இருண்மலம் - ஆணவமலம். ஆறாயிரம் என்றது அளவிறந்த என்றவாறு.

(20)