(வி - ம்.) செம்மல் - தலைவன். ஓப்பி - ஓட்டி; அகற்றி. நின்னுலகம் என்றது கந்தவுலகத்தை.

(26)

(இ - ள்.) இவ்வாறு தேவேந்திரன் விரும்பிய வரங்களை எல்லாம் எம்பெருமான் வழங்கினன். மேலும் ஏனை வானவரும் தாந்தாம் விரும்பிய பேறுகளை அருளப்பெற்றனர். தேவேந்திரன் தனக்குரிய பசிய கற்பகத்தரு காமதேனு புகழப்படும் சங்கநிதி பதுமநிதிகள் மணிகள் படைக்கலன்கள், எதிரொலியமைந்த சுதன்மமென்னும் சபை என்னும் இவற்றை யுள்ளிட்ட எல்லாப் பொருளையும் பெற்றனன்.

(வி - ம்.) வேட்ட - பலவறிசொல். அந்தரர் - வானவர். தரு - கற்பகம். சந்தம் - அழகுமாம்.

(27)

(இ - ள்.) அருள்பெற்ற அவ்விந்திரன் பலமுறையும் பணிந்து போற்றித் தன் தேவர்கணங்கள் புடைசூழ்ந்துவர ஒளிமிக்க திருக்கோயிலினின்றும் புறப்பட்டுத் தனது வானாட்டிற்சென்று வதிவானாயினன். அந்தப் பெருமையுடைய அழகிய வேற்படையுடைய முருகப்பெருமானுடைய அழகிய முடிமிசை அச்சுனையிலுள்ள அழகிய நீலமணிபோன்ற நீரும் செங்கழுநீர் மலரும் நாடோறும் ஏறாநின்றன.

(வி - ம்.) பண்ணவர் - தேவர். வில் - ஒளி. கொன் - பெருமை. வேலான் திருமுடி ஏறும் என இயைக்க.

(28)

(இ - ள்.) மலரோனும் இந்திரனும் என்னும் இவர்கள் வாழ்க்கையும் ஏனைய தேவர்கள் வாழ்க்கையும் இந்திரசாலம்போன்று பொய்மையாம்படி அடியார்க்கு மெய்யுணர்வாகிய இனிய அருளையுண்டாக்கும் இத்திருத்தணிகை நகரம் மேற்கூறிய காரணத்தானே இந்திரநகர மென்றும் ஆண்டுள்ள பெரியசுனை இந்திரதீர்த்தம் என்றும் பெயர் பெற்று வழங்கப்படும்.

(வி - ம்.) இனி, மலரோன் இந்திரன் ஏனைத்தேவருமாகிய இவர்கள் (இழந்துவிட்ட) வாழ்க்கையனைத்தும் இந்திரசால வித்தை