மூக்கெழுந்த முத்து-முத்தாலான மூக்குத்தி; அதை உடையார் ஈண்டு மங்கையர், நகரின் சிறப்பும் கால முதன்மையும் தோன்ற ‘நன்னகர் மூதூர்’ என்று ஈரடை கொடுத்துரைத்தார். அகத்திய முனிவர் வடநாட்டினர். இறைவன் இமயச்செல்வியாகிய உமையம்மையை மணந்த ஞான்று தென்னாடு செல்லுமாறு பணிக்க முனிவர் திருக்குற்றாலநகருக்கு வந்தார் என்பது புராணம் கூறும் வரலாறு. அதனால், ‘வாக்கெழுந்த குறு முனிக்கா’ என்றார். மறி-மான். கரம்-கை. முனிவர் திருக்குற்றாலம் வந்தபோது குற்றாலத்தில் திருமால் கோவிலே இருந்ததெனவும், இவர் சைவ நெறியினராதலால், அங்குள்ள திருமாலடியார் இவரை ஊர்க்குள் செல்லாவாறு தடுத்தனரெனவும் அப்பால் இவர் சென்று தம் ஆற்றலால் திருமால் உருவை மாற்றி இலிங்க உரு ஆக்கினாரெனவும் திருக்குற்றாலத் தல புராணம் கூறும். இவ் வரலாற்றை விளக்க ‘குறு முனிக்கா......வள்ளலார்’ என்றார்.

இறைவன் திருவடிகளில் நான்கு வேதங்களும் ஒலித்து அவன் பெருமையைப் பேசுகின்றன என்பதை உருவகமாக்கிச் சிலம்பாகக் கூறுதல் ஆன்றோர்மரபு. இதனை, ‘எழுதரியமறைச்சிலம்பு கிடந்து புறத்தலம்ப அன்பர் இதயமென்னும், செழுமலர் ஓடையின் மலர்ந்து சிவானந்தத் தேன்ததும்பு தெய்வக் கஞ்சத், தொழுதகு சிற்றடி’ என்றார் பரஞ்சோதியார் திருவிளையாடற் புராணத்துள். அதனால் ‘மறை நான்கும்...... பாதர்’ என்றார்.

மேக்கு-மேற்குத்திசை கிழக்கு-கீழ்த்திசை. இவற்றுள் திங்களும் ஞாயிறும் தோன்றுதலால் மதிசூடி ஞாயிறுபோல் என அழகுறக் கூறினார். மலைமேல் காட்சியளிக்கும் ஞாயிறு திங்களின் இயற்கையைக் காட்டிய நயம் காண்க.