திருஞானசம்பந்த சுவாமிகள் அருளிச்செய்த

திருக்குற்றாலப்பதிகம்

பண்: குறிஞ்சி

திருச்சிற்றம்பலம்

வம்பார்குன்றந் நீடுயர்சாரல் வளர்வேங்கைக் கொம்பார்சோலை கோலவண்டியாழ்செய் குற்றாலம் அம்பால்நெய்யோ டாடல்அமர்ந்தான் அலர்கொன்றை நம்பான்மேய நன்னகர்போலும் நமரங்காள். 1 பொடிகள்பூசித் தொண்டர்பின் செல்லப் புகழ்விம்மக் கொடிகளோடு நாள்விழமல்கு குற்றாலம் கடிகொள்கொன்றை கூவிளமாலை காதல்செய் அடிகள்மேய நன்னகர்போலும் அடியீர்காள் 2 செல்வமல்கு செண்பகம்வேங்கை சென்றேறிக் கொல்லைமுல்லை மெல்லரும்பீனுங் குற்றாலம் வில்லின்ஒல்க மும்மதில்எய்து வினைபோக நல்குநம்பான் நன்னகர்போலும் நமரங்காள். 3 பக்கம்வாழைப் பாய்கனியோடு பலவின்தேன் கொக்கின்கோட்டுப் பைங்கனிதூங்குங் குற்றாலம் அக்கும்பாம்பும் ஆமையும்பூண்டோர் அனலேந்தி நக்கன்மேய நன்னகர்போலும் நமரங்காள். 4 மலையார்சாரல் மகவுடன்வந்த மடமந்தி குலையார்வாழைத் தீங்கனிமாந்துங் குற்றாலம் இலையார்சூலம் ஏந்தியகையான் எயில்எய்த சிலையான்மேய நன்னகர்போலும் சிறுதொண்டீர். 5 மைம்மாநீலக் கண்ணியர்சாரல் மணிவாரிக் கொய்ம்மாஏனல் உண்கிளிஒப்பும் குற்றாலம் கைம்மாவேழத் தீருரிபோர்த்த கடவுள்எம் பெம்மான்மேய நன்னகர்போலும் பெரியீர்காள். 6 நீலநெய்தல் தண்சுனைசூழ்ந்த நீள்சோலைக் கோலமஞ்ஞை பேடையொடாடுங் குற்றாலம் காலன்தன்னைக் காலாற்காய்ந்த கடவுள்எம் சூலபாணி நன்னகர்போலும் தொழுவீர்காள். 7 போதும்பொன்னும் உந்திஅருவி புடைசூழக் கூதல்மாரி நுண்துளிதூங்கும் குற்றாலம் மூதூர்இலங்கை முட்டியகோனை முறைசெய்த நாதன்மேய நன்னகர்போலும் நமரங்காள். 8 அரவின்வாயின் முள்ளெயிறேய்ப்ப அரும்பீன்று குரவம்பாவை முருகமர்சோலைக் குற்றாலம் பிரமன்னோடு மாலறியாத பெருமையெம் பரமன்மேய நன்னகர்போலும் பணிவீர்கள். 9 பெருந்தண்சாரல் வாழ்சிறைவண்டு பெடைபுல்கிக் குருந்தம்ஏறிச் செவ்வழிபாடும் குற்றாலம் இருந்துண்தேரும் நின்றுண்சமணும் எடுத்தார்ப்ப அருந்தண்மேய நன்னகர்போலும் அடியீர்காள். 10 மாடவீதி வருபுனற்காழி யார்மன்னன் கோடல்ஈன்று கொழுமுனைகூம்புங் குற்றாலம் நாடவல்ல நற்றமிழ்ஞான சம்பந்தன் பாடல்பத்தும் பாடநம்பாவம் பறையுமே. 11 திருச்சிற்றம்பலம்