முகப்பு

பக்கம் எண் :

தொடக்கம்

151 அஞ்சன வண்ணன் என்உயிர் நாயகன் ஆளாமே வஞ்சனை யால்அர செய்திய மன்னரும் வந்தாரே செஞ்சரம் என்பன தீயுமிழ் கின்றன செல்லாவோ உஞ்சிவர் போய்விடின் நாய்க்குகன் என்றெனை ஓதாரோ   ஆழ நெடுந்திரை ஆறு கடந்திவர் போவாரோ வேழ நெடும்படை கண்டு விலங்கிடும் வில்லாளோ தோழமை என்றவர் சொல்லிய சொல்ஒரு சொல்லன்றோ ஏழமை வேடன் இறந்திலன் என்றெனை ஏசாரோ   முன்னவன்என்று நினைந்திலன் மொய்புலி அன்னான்ஓர் பின்னவன் நின்றனன் என்றிலன் அன்னவை பேசானேல் என்இவன் என்னை இகழ்ந்தது இவ்வெல்லை கிடந்தன்றோ மன்னவர் நெஞ்சினில் வேடர் விடும்சரம் வாயாவோ   பாவமும் நின்ற பெரும்பழியும் பகை நண்போடும் ஏவமும் என்பவை மண்ணுல காள்பவர் எண்ணாரோ ஆவது போகஎன்அருயிர்த் தோழமை தந்தான்மேல் போவது சேனையும் ஆருயிரும்கொடு போயன்றோ   அருந்தவம் என்துணை ஆள இவன்புவி ஆற்றானோ மருந்தெனின் அன்றுயிர் வண்புகழ் கொண்டுபின் மாயேனோ பொருந்திய கேண்மை உகந்தவர் தம்மொடும் போகாதே இருந்தது நன்று கழிக்குவென் என்கடன் இன்றோடே   தும்பியும் மாவும் மிடைந்த பெறும்படை சூழ்வாரும் வம்பியல் தாரிவர் வாள்வலி கங்கை கடந்தன்றோ வெம்பிய வேடர் உளீர் துறைஓடம் விலக்கீரோ நம்பிமுன் னேஇனிநம் உயிர் மாய்வது நன்றன்றோ   போனபடைத்தலை வீரர்தமக்கிரை போதாதோ சேனைக் கிடைக்கிடு தேவர் வரின்சிலை மாமேகம் சோனை படக்குடர் சூறைபடச் சுடர் வாளோடும் தானை படத்தனி யானைபடத் திரள் சாயேனோ   நின்ற கொடைக்கைஎன் அன்பன் உடுக்க நெடுஞ்சீரை அன்று கொடுத்தவன் மைந்தர்பலத் தைஎன் அம்பாலே கொன்று குவித்த நிணங்கொள் பிணக்குவை கொண்டோடித் துன்று திரைக்கடல் கங்கை மடுத்தினி தூராதோ

முன் பக்கம்

மேல்

அடுத்த பக்கம்