மலையெறிய மன்னர்க்கு மன்னன் - நிலையறியாத்
தொல்லார் கலிவலையந் தோள்வலைய முன்றிருந்த
வில்லா னடுவுள்ள வெற்பெடுத்தோன் - ஒல்லைக்
கொலையே றுடம்படையக் கொய்தாலு மெய்தாத்
துலையேறி வீற்றிருந்த தோன்றல் - தலையேறு
மண்கொண்ட பொன்னிக் கரைகட்ட வாராதான்
கண்கொண்ட சென்னி கரிகாலன் - எண்கொள்
பணம்புணர்ந்த மோலியான் கோமகளைப் பண்டு
மணம்புணர்ந்த கிள்ளி வளவன் - அணங்கு
படுத்துப் பொறையனைப் பொய்கைக்குப் பண்டு கொடுத்துக் களவழிப்பாக் கொண்டோன் - அடுத்தடுத்துச்

வரிகள் 30 - 40 : நிலையறியாத் .............களவழிப்பாக்கொண்டோன்

சொற்பொருள் : நீரின் நிலையறிய முடியாத பழைமையான கடல் சூழ்ந்த பூமி வட்டமானது தன் தோள் வாகுவலயமாக முன்னர்த் திருந்தும்படி தன் வில்லால் நடுவிலுள்ள மலைகளையிடித்து மாற்றியவனும், விரைவாகக் கொலை நேரும்படி உடல் முழுவதும் தசைதசையாக அறுத்தாலும் சமனாக நில்லாத தராசுத் தட்டில் ஏறிப் பெருமையுடனிருந்த வேந்தனும், தலையில் ஏறிய மண்ணைக்கொண்டு காவிரிக்கரை கட்ட வராதவளுடைய கண்ணைக்கெடுத்த சோழனாகிய கரிகாலனும், மதிக்கத்தக்க படம் பல பொருந்திய முடியுடைய நாகவரசன் மகளை முற்காலத்துத் திருமணம்புரிந்த கிள்ளிவளவனும், சேரமான் கணைக்காலிரும்பொறையைச் சிறையில் வைத்துத் துன்புறுத்திப் பின்னர்ப் பொய்கையார் என்ற புலவர் பொருட்டுச் சிறைவீடுசெய்து அவர்பாற் கொடுத்துக் களவழி நாற்பது என்னும் நூலையேற்றுக் கொண்ட செங்கணான் சோழனும்,

விளக்கம் : தொன்மை + ஆர்கலி - தொல்லார்கலி - பழைமையான கடல். வலையம் - வட்டம். தோள்வலையம் - வாகுவலயம் என்ற அணி. நிலவட்டம் வாகுவலையம்போல இருக்க வேண்டும் என்று கருதி நாட்டின் நடுவேயுள்ள மலைகளையெல்லாம் வில்லாலே யிடித்து வட்டமாக மாற்றியவன் என்பது கருத்து. இவன் பிருது சக்கரவர்த்தி என்றும், இதனை விளக்குவது குமார சம்பவம் 1 : 2 ஆம் சுலோகம் என்றும் டாக்டர் உ. வே. சா. குறித்துள்ளார். அது தவிர வேறு குறிப்பொன்றுங் காணக்கிடைத்திலது.

      கொலையேற என்பது அகரங் குறைந்து நின்றது : தொகுத்தல் விகாரம். உடம்பு கொலையேற அடையக் கொய்தாலும் என மாற்றுக. உயிர் இறக்கும்படி முழுவதும் அறுத்தாலும் என்பது பொருள். எய்தாத்துலை; சமநிலையடையாது நின்றதுலை எனக் கொள்க. வீற்றிருந்த என்பது கவலையின்றி மகிழ்ச்சியோடு இருந்தான் என்பதை யுணர்த்தியது. இவன் சிபிச் சக்கரவர்த்தி என்பது எவர்க்கும் தெரியும். சிபி வரலாறு குறித்த நூல்கள் பல. சிலப். 20 : 51 - 2, 23 : 57 - 58 : 29; அம்மானைவரி. கலிங், இராச; 20. கம்பரா. திருவவ : 65, குலமுறை. 7, 6, விபீட; 110, திருக்குறள் 72, பரிமேலழகர் உரை, விக்கி. உலா 21, 22, இராச........உலா 11, 12, புறநா 37, 39, 43 - 46 ஆகிய இடங்களிலும் காணலாம்.

      தலையேறு மண்கொண்ட கரை என மாற்றி மக்கள் தலைமேல் கூடைமண் ணேற்றிவைத்துச் சுமந்துகொண்டுபோய்க் கொட்டிக் கட்டிய கரை என விளக்கம் காண்க. கொண்ட கரை, பொன்னிக்கரை எனக் கூட்டுக. அக்கரை கட்டுதற்கு வாராதவள் என்க. ஈழத்துப்பிடாரி என்பது உ. வே. சா. குறிப்பு. வராதான் என்ற பாடமும் உள்ளது. வாராதான் என்ற பாடங்கொண்டால் முகரி எனக் கூறலாம். "தொழுது மன்னரே கரைசெய் பொன்னியிற் றொடர வந்திலா முகரியைப் படத், தெழுதுகென்றுகண் டிதுமிகைக்கணென் றிங்கழிக்கவே யங்கழிந்ததும்" (கலிங். இராச. 20) என வந்திருத்தல் காண்க. முகரி - பிரதாபருத்திரன் என்றும் அவன் படத்தின் விழியைக் கோலாற் சோழன் இங்குக் குத்தியவுடன் அங்கு அவன்விழி கெட்டது என்பதும் வரலாறு.

"கண்கொண்டான் பொன்னிக் கரைகட்ட வாரானை,
யெண்கொண்ட சோழ னிரங்கேசா"
 

      பொறையனை அணங்குபடுத்து - பொறையனைத் துன்பப்படுத்தி : இது சிறைச்சாலையில் வைத்துத் துன்பப்படுத்தியதைக் குறிக்கும். பொய்கைக்கு என்பது பொய்கையார் என்ற புலவர் வேண்டுகோளுக்காக. கொடுத்து - பொறையனை அப் புலவர் பால் விடுத்து என விரித்துக்கொள்க. "களவழி நாற்பது" என்ற நூலினைக் கேட்டுப் பின் சிறைவீடு செய்வதன் என வரலாறிருப்பதனால் "களவழிப்பாக்கொண்டு பண்டுகொடுத்தவன்" என மாற்றிப் பொருள் கொள்க. இவன் சோழன் செங்கணான் என்ற பெயருடையவன். திருப்போர்ப்புறத்துச் சோழன் செங்கணான் சேரமான் கணைக்காலிரும்பொறையைப் பொருதுவென்று கைப்பற்றிச் சிறையில் வைத்தான். அதனையறிந்த பொய்கையார் சோழன் செங்கணான் வெற்றியைச் சிறப்பித்துக் "களவழி நாற்பது" என்ற நூல் பாடி யரங்கேற்றினர். செங்கணான் புலவர்க்குப் பரிசளிக்க அதனை மறுத்து இரும்பொறையைச் சிறைவீடு செய்வதே எனக்குப் பரிசிலாம் என்று கூறினர். அது கேட்ட சோழன் அவ்வாறே விடுதலை செய்தான் என்பது வரலாறாகும். இது புறநானூறு 74 ஆம் கவியின் கீழ்க் குறிப்பாலும், களவழி நாற்பது நூலின் முன்னுரையாலும் அறியலாம். விக்கி...........உலா 27, 28 ; இராசரா........35, 36; சங்கர : 27, 28 ; தொல். புறத். 36, நச். மேற், கலிங். இராச 19; இவற்றிலும் இக் குறிப்புக் காணப்படுகிறது. இங்குக் கூறப்பட்டவர் பிருது, சிபி, இரண்டாம் கரிகாலன், கிள்ளிவளவன், கோச்செங்கணான் என்னும் ஐவராவர்.