(இ-ள்.) மயிலேறி.............குமரேசனே! -; கொங்கை இல்லாதவட்கு
எத்தனைப் பணி உடைமை கூடினும் பெண்மையில்லை - கொங்கையில்லாத
பெண்ணுக்கு எவ்வளவு அணிகளும் ஆடைகளும் இருந்தாலும்
பெண்மையின் அழகுவராது. கூறும் நிறைகல்வி யில்லாமல் எத்தனை கவிதை
கூறினும் புலமையில்லை - புகழத்தக்க நிறைந்த கல்வி யில்லாமல் எவ்வளவு
செய்யுள் இயற்றினாலும் புலமையாகாது; சங்கை இல்லாதவர்க்கு எத்தனை
விவேகம் தரிக்கினும் கனதைஇல்லை - நாணம் இல்லாதவர்களுக்கு
எத்துணை அறிவிருப்பினும் பெருமையுண்டாகாது; சட்சுவை பதார்த்தவகை
உற்றாலும் நெய்யிலாச் சாதமும் திருத்தியில்லை - அறுசுவைக்
கறிகளிருந்தாலும், நெய்யில்லாவுண்டி மனநிறைவு தராது; பங்கயம் இலாமல்
எத்தனை மலர்கள் வாவியிற் பாரித்தும் மேன்மையில்லை - தாமரைமலர்
இல்லாமல் வேறு எத்துணைப் பூக்கள் பொய்கையில் நிறைந்தாலும்
உயர்வில்லை; பத்தி இல்லாமல் வெகு நியமமாய் அர்ச்சனைகள் பண்ணினும்
பூசையில்லை - அன்பின்றி மிக ஒழுங்காக மலரிட்டு வணங்கினாலும்
வழிபாடாகாது; மங்கையர் இலா மனைக்கு எத்தனை அருஞ்செல்வம் வரினும்
இல்வாழ்க்கை இல்லை - மனைவியர் இல்லாத இல்லத்திற்கு எவ்வளவு அரிய
செல்வம் வந்தாலும் இல்லறம் ஆகாது.

     (கருத்து) எப்பொருளும் அதனைச் சிறப்பிக்கக்கூடிய ஒன்று
இல்லாவிடின் மேன்மையுறாது.                           (63)