விசாரமே அல்லாது - இழிவும் நீங்காத கவலையுமே அன்றி, சிந்தையில்
தைரியம் இல்லை - உள்ளத்தில் வீரம் இராது; செய்ய சபைதன்னிலே
சென்றுவர வெட்கம்ஆம் - நல்ல சபையிலே போய்வர நாணமுண்டாகும்;
செல்வரைக் காணில் நாணும் - பணமுடையோரைக் கண்டால் உள்ளம்
வெட்கமடையும், உறுதிபெறு வீரமும் குன்றிடும் - நன்மை தரும் வீரமும்
குறைந்துவிடும்; விருந்துவரின் உயிருடன் செத்த பிணம்ஆம் - விருந்தினர்
வந்தால் உயிருடன் இறந்த பிணமாக நேரும்; உலகம் பழித்திடும் -
உலகத்தார் இகழ்வர்; பெருமையோர் முன்புசென்று ஒருவரொரு செய்தி
சொன்னால் மறுவசனமும் சொல்லார் - பெருமையுடையோர் எதிரிற்போய்
ஒரு வறுமையுடைய ஒருவர் ஒரு செய்தியைக் கூறினால் மறுமொழியும்
விளம்பார்; துன்பினில் துன்பம் இதுவந்து அணுகிடாது அருளுவாய் -
துன்பத்திலே துன்பமான இவ்வறுமை (ஒருவருக்கும்) வந்து சேராமல்
அருள்செய்வாய்.

     (கருத்து) வறியவர் இவ்வுலகில் எவ்வகையினும் இன்பம் அடையார்.                                                      (77)