மறைத்தாலும் அந்நிலையிலும் கதிரவன் ஒளிதருவான்; கூறும் மதி
தேய்பிறையதாகவே குறையினும் குவலயத்து இருள் சிதைக்கும் -
சொல்லப்பட்ட திங்கள் தேய்பிறையாகக் குறைந்தாலும் உலகிலுள்ள இருளை
ஓட்டும்; கொல்லைதான் சாவிபோய்விட்டாலும் அங்குவரு குருவிக்கு
மேய்ச்சல் உண்டு - புன்செய் நிலம் விளைவின்றிப் பட்டுப்போனாலும்
அந்நிலத்திற்கு வரும் குருவிகளுக்குத் தீனி கிடைக்கும்; வீறுடன் உதாரிதான்
மிடியானபோதினிலும் - சிறப்புடன் கொடுப்போன் வறுமையுற்றாலும், மிகநாடி
வருபவர்க்கு - சாலவுந் தேடிவருவோர்களுக்கு, இல்லையென்று உரையாது
வேறுவகை இயன்றன வியந்து உளம்மகிழ்ந்து உதவுவான் - இல்லையென்று
கூறாமல் வேறுவகையிலே முடிந்த பொருள்களை வியப்புறும்படி
மனங்களித்துக் கொடுப்பான்.

     (விளக்கவுரை) ஞாயிற்றை இராகு எனும் பாம்பு மறைப்பதாகக்
கூறுவது புராணக்கதை. கட்செவி - பாம்பு (கண்ணே செவியாகவுமுடையது).
கொல்லை என்பது முல்லை நிலம்: இக்காலத்திற் புன்செய் என்கிறோம்.
காடும் காடுசார்ந்த இடமும் முல்லை. உதாரி (வட) - கொடையாளி. உதாரம்
- கொடை. மிடி - வறுமை. ‘வியந்து' என்பதற்கு ‘வியக்க' எனப் பொருள்
கூறல்வேண்டும். கம்பீரம் (வட). வீரத்தோற்றம் ‘இலன் என்னும் எவ்வம்
உரையாமை யீதல்-குலனுடையான் கண்ணே யுள' என்பது குறள்.

     (கருத்து) கொடைப்பண்புடையோர் தம் உயிரையும் ஈவரே ஒழிய
இல்லையென்று இயம்பார்.                          (79)