(இ-ள்.) வேலைதனில் மாஆகி வருசூரன் மார்பு உருவ
வடிவேலைவிட்ட முருகா! - கடல் நடுவிலே மாமரமாகிவந்த சூரன்
மார்பிற்படும்படி வடிவேலை விடுத்த முருகனே!, மயிலேறி....... குமரேசனே!-,
தேவ ஆலயம் சுற்றிடாத கால் என்ன கால்? - (நின்) தெய்வக்கோயிலை
வலம்வராத கால் காலன்று; தெரிசியாக்கண் என்ன கண்? - காணாத கண்
பயனற்ற கண்; தினமுமே நின்கமல பாதத்தை நினையாத சிந்தைதான் என்ன
சிந்தை? - நாடோறும் உன் தாமரைத்தாள்களை எண்ணாத உள்ளம்
பயனற்றது; மேவு ஆகமம் சிவபுராணம் அவை கேளாமல் விட்ட செவி
என்ன செவிகள்? - பொருந்திய சைவ ஆகமங்களையும்
சிவபுராணங்களையும் கேளாது விலகும் செவிகள் பயனற்றவை; விமலனை
வணங்காத சென்னி என் சென்னி - குற்றமற்ற சிவபரம்பொருளை வணங்காத
தலை பயனுடையது அன்று; பணிவிடை செயாக் கை என்ன கை? -
தொண்டு செய்யாத கைகள் பயனற்றவை; நாவுஆர நினை ஏத்திடாத வாய்
என்ன வாய்? - நாநிறைய உன்னை வாழ்த்தாத வாய் பயனற்றது; நானிலத்து
நல்தீர்த்தம் மூழ்கா உடல் என்ன உடல்? - உலகிலே தூய சிவதீர்த்தங்களில்
மூழ்காத மெய்யாற் பயனில்லை; பரவி ஆகிய சனனம் நண்ணினால் பலன்
ஏது? - பாவத்தன்மை பொருந்திய இத்தகைய பிறவி எடுத்ததனாலே
எப்பயனும் இல்லை.