வரக்கூடிய பெரிய சந்திப்பான இடத்திலே பல பழங்களுடன் நிற்கும்
மரமும்; கருணையுடனே வைத்திடும் தண்ணீர்ப்பந்தலும் - அருளுடன்
அமைக்கப்பெற்ற தண்ணீர்ப்பந்தலும், காவேரிபோல் ஊற்றமும் - காவிரியைப்
போல வற்றாது சுரக்கும் நீரூற்றும், விண்தலத்து உறைசந்திர ஆதித்த
கிரணமும் - வானிலே உலவும் திங்கள் ஞாயிறுகளின் ஒளியும்; வீசும் மாருத
சீதமும் (சீத மாருதமும் என்று மாற்றுக) வீசுகின்ற குளிர்ந்த காற்றும்;
விவேகியெனும் நல்லோரிடத்தில் உறுசெல்வமும் - அறிவாளிகளான
நல்லவரிடத்திலே உண்டாயிருக்கும் செல்வமும்; வெகுசனர்க்கு உபகாரம்
ஆம் - பல மக்களுக்கு ஆதரவாகும்.

     (விளக்கவுரை) ஊருணி - ஊராரால் உண்ணப்படும் நீர்நிலை.
முற்காலத்திலே ஊருக்குப் பொதுவான இடத்திலே பெரிய மரத்தடியிலே
உள்ள மேடையே பொதுக்கூட்டங்கள் நடைபெறும் இடம். சனர் (வட) -
மக்கள். விவேகி (வட) - அறிவாளி. விவேகி : ஒருமை; நல்லோர் : பன்மை.
ஆகையால், ‘விவேகியெனும் நல்லோர்' என்பது ஒருமை பன்மை மயக்கம்.
களபம் - கலவைச் சந்தனம். குங்குமப்பூ கலப்பதாற் ‘செங்களபம்' ஆயிற்று.

     (கருத்து) முகில்பொழியும் மழையும் அதனுடன் கூறப்பெற்ற
மற்றவைகளும் எல்லோருக்கும் பயன்படுவன.                (16)