என்று பட்டினப் பாலையிற் கூறிய தொப்ப இவர், சோழ வேந்தனைச் சேடி சுட்டிக் காட்டியதாக அமைத்த இத்தொடரில், ‘துன்னார், கணங்கவிழ்ந்த வேலன்’ என்றார்.

‘¹காலனம் காலம் பார்க்கும் பாராது
வேலீண்டு தானை விழுமியோர்’

என்று பிறரும் வேலையே சிறப்பித்துக் கூறுதலும் அறிக. (134)

142. போர்வாய் வடிவேலால் போழப் படாதோரும்
சூர்வாய் மதரரிக்கண் தோகாய்கேள்-பார்வாய்ப்
பருத்ததோர் மால்வரையைப் பண்டொருகால் செண்டால்
திரித்தகோ இங்கிருந்த சேய்.

(இ - ள்.) போர்வாய் வடிவேலால் - போர்க்களத்தில் கூர்மை பொருந்திய வேற்படையினால், போழப் படாதோரும் - பிளக்கவொண்ணாத வீரர்களும், சூர்வாய் மதர் அரிக்கண் தோகாய் - அச்சங்கொள்ளுமாறு செய்கின்ற மதர்த்த செவ்வரியோடிய கண்களையுடைய மயில்போன்றாய்! கேள் - நான் கூறுவதைக் கேட்பாயாக, பார்வாய்-இம் மண்ணுலகில், பருத்தது ஓர் மால் வரையை - பருத்து ஒப்புயர்வற்றதாய் இருக்கின்ற நீண்ட பொன்மலையை, பண்டு ஒருகால் - முன் ஒரு காலத்தில், செண்டால் திரித்த கோ - செண்டாலடித்து நிலைபெயரச் செய்த (பாண்டி) மன்னனாவான், இங்கு இருந்த சேய் - இதோ இங்கு வீற்றிருக்கும் இவ்விளங்குமரன்.

(க - து.) வீரர்களையும் அஞ்சச் செய்கின்ற இரேகை படர்ந்த கண்களையுடையாய் ! இங்கு வீற்றிருப்போன், பொன்மலையைச் செண்டால் அடித்து நிலைகலங்கச் செய்த பாண்டி மன்னனாவான் என்பதாம்.

(வி - ரை.) வீரர்கள், யாருக்கும் அஞ்சாத நெஞ்சத் திண்மை படைத்தவர். அவர்களும் தமயந்தியின் கட்பார்வைக்கு அஞ்சுவர் என்றது, காதலாற் கலக்கமுறும் நிலையை. எனவே, தமயந்தியின் கண்பார்வை ஏற்றத்தைக் கூறியவாறாம். சூர் - அச்சம். உலகத்திலேயே சிறந்த பெரிய மலை, இமயம். அதனையும் செண்டால் அடித்து நிலைகுலையச் செய்த பெருமை பாண்டி மன்

1. புறம் : 41.