னனுக்குரியது. ஒருவன் செய்த செயற்கருஞ் செயலை, அவன் வழிவந்தார் பிறர்க்கும் ஏற்றிக் கூறுதல் உலகியன் முறை. அம்முறைபற்றிப் பாண்டியர் வழித்தோன்றிய பாண்டிய மன்னனை ‘மால்வரையை......செண்டால் திரித்தகோ’ என்றார். செண்டால் என்பதில் மூன்றாம் வேற்றுமை ஆல் உருபு கருவிப் பொருளில் வந்தது. சேய் : முருகவேளை யொத்தவன் என்றலுமாம். செண்டு - செண்டு போன்ற ஒருவகைப் போர்க்கருவி. (135)

143. வென்றி நிலமடந்தை மென்முலைமேல் வெண்துகில்போல்
குன்றருவி பாயும் குடநாடன் - நின்றபுகழ்
மாதே இவன் கண்டாய் மானத் தனிக்கொடியின்
மீதே சிலைஉயர்த்த வேந்து.

(இ - ள்.) நின்றபுகழ் மாதே - நிலைபெற்ற புகழையுடைய பெண்ணே ! இவன் - இவ்வேந்தன், வென்றி நிலமடந்தை மென் முலைமேல் - வெற்றி பொருந்திய நிலமகளின் மெல்லிய கொங்கைகளின் மேலுள்ள, வெண்துகில் போல் - வெண்மையாகிய ஆடையைப் போல, குன்று அருவி பாயும் குடநாடன் - மலையினின்றும் அருவிநீர் பாய்ந்தோடுகின்ற மேற்கு நாட்டரசனாகிய, மானத்தனி கொடியின்மீது - பெருமைபொருந்திய ஒப்பற்ற தன் கொடியாடையின்மேல், சிலை உயர்ந்த வேந்து - விற்குறி (எழுதி) யேற்றிய சேர மன்னனாவான், கண்டாய் - அறிந்துகொள்க.

(க - து.) நிலையான புகழுடைய மாதே ! இந்நின்றவன், தன் கொடியில் விற்குறி எழுதி உயர்த்திய மேற்கு நாட்டுக்குக்குரியனான சேர மன்னனாவான் என்பதாம்.

(வி - ரை.) வென்றி - வெற்றி : மெலித்தல் விகாரம். நிலமகளுக்கு வென்றியாவது, எல்லாவுயிர்களையும் தன்னகத்தே தாங்கிப் பகையும் நொதுமலுமின்றி நடுநின்று பல்வகை வளங்களும் தந்து நல்லோர்க்கு இடனாக இருந்து பாதுகாத்தல். இதன் பெருமையை விளக்கவே ஒளவையாரும்,

¹‘நாடா கொன்றோ காடா கொன்றோ
அவலா கொன்றோ மிசையா கொன்றோ
எவ்வழி நல்லவர் ஆடவர்
அவ்வழி நல்லி வாழிய நிலனே’

என, நிலத்தை வாழ்த்தியதூஉம் காண்க.

1. புறம் : 187.