நாட்டாருடைய வேந்தர் மகனாவான், கண்டாய் - அறிந்து கொள்வாயாக.

(க - து.) ‘ஏ அம்சாயல் மானே ! எருமைகளின் வாயினின்றும் பாலொழுகுமாறு வளர்ந்துள்ள செஞ்சாலியின் தாள்களைக் கடித்துக் குதட்டுகின்ற வளமிக்க மச்சநாட்டுக்கு மன்னன் ஆவான்’ என்பதாம்.

(வி - ரை.) அம்சாயல் - தோற்றத்தின் அழகு. அல்லது அழகிய மென்மை எனலுமாம். மான் - மான்போன்ற மருட்சியையுடைய தமயந்தியைக் குறித்தலால் உவமை ஆகுபெயர். வெம்மை - விருப்பம். கருப்பஞ்சாறே நீராகப் பாய்ந்தோடி நெற்பயிர்களை வளர்க்கும் என்பதனால் அந்நாட்டின் நிலவளனும் நீர்வளனும் மிக்கதென்பது போதரும். கருப்பஞ்சாற்றின் வளங்கொண்டு வளர்ந்த நெற்பயிர்களை எருமை மாடுகள் கடிக்குங்கால் அதிலிருந்து பால் ஒழுகி ஓடுகின்றதெனவே நெல்லின் செழுமையை உணர்த்தியவாறாம்.

மச்சத்தார் - மச்ச நாட்டில் வாழும் மக்கள். கோமான் - வேந்தன். வாய்க்கடை : கடைவாயெனச் சொன்னிலைமாறிய இலக்கணப் போலி. (140)

148. வண்ணக் குவளை மலர்வௌவி வண்டெடுத்த
பண்ணிற் செவிவைத்தப் பைங்குவளை - உண்ணா
தருங்கடா நிற்கும் அவந்திநா டாளும்
இருங்கடா யானை இவன்.

(இ - ள்.) இவன் - இவ்வேந்தன், அரும் கடா வண்ணக்குவளை மலர் வௌவி-அருமையாகிய எருமைக் கடாக்கள் அழகிய குவளைமலர்களைப் பற்றிக் கௌவி, வண்டு எடுத்த பண்ணில் செவி வைத்து - அதிலுள்ள வண்டுகள் அப்போது பாடுகின்ற இசைப் பாடலைக் காதுகொடுத்துக் கேட்டு, அப்பைங்குவளை உண்ணாது நிற்கும்-அந்தப் பசிய குவளையை உண்ணாமல் (அப்பண்ணிசைக்கு மயங்கி) நிற்கின்ற,அவந்தி நாடு ஆளும் - அவந்தி நாட்டை ஆட்சி புரிகின்ற, இரும்கடா யானை - பெரிய ஆண் யானையை ஒத்தவனாவான்; (காண்பாயாக).

(க - து.) ‘பெண்ணருங்கலமே! இவ்வேந்தன் குவளை மலரைக் கௌவி யெடுத்த ஆண் எருமைகள் அதிலுள்ள