இழந்து காகுத்தன் கைகேசியால் நாட்டை இழந்து காடு செல்லும்படி ஏவப்பெற்ற காலையில் அவன் முகப்பொலிவு குன்றாதிருந்த இயல்பைக் கம்பரும், ¹‘அப்பொழு தலர்ந்த செந்தாமரையினை வென்ற தம்மா’ என்று கூறுவது நோக்கத் தக்கது. (155)

163. மல்லல் மறுகின் மடநா குடனாகச்
செல்லும் மழவிடைபோல் செம்மாந்து - மெல்லியலாள்
பொன்மாலை பெற்றதோ ளோடும் புறப்பட்டான்
நன்மாலை வேலான் நளன்.

(இ - ள்.) நல் மாலை வேலான் நளன் . நல்ல மலர்மாலையணிந்த வேற்படையைக் கொண்டவனாகிய நள மன்னன், மல்லல் மறுகில் - வளப்பம் பொருந்திய வீதியில், நாகு உடன் ஆக செல்லும் மழவிடைபோல் - இளமையுள்ள பசுவானது தன்னுடன் கூடவர நடந்து செல்கின்ற இளமை பொருந்திய காளையைப் போன்று, செம்மாந்து - களிப்பால் விம்மிதமடைந்து, மெல் இயலாள் பொன்மாலை பெற்ற தோளோடும் புறப்பட்டான் - மென்மைத்தன்மையுள்ள தமயந்தியின் அழகிய சுயம்வர மாலையை யணிந்த தோளின் தோற்றப் பொலிவுடன் புறப்பட்டுச் சென்றான்.

(க - து.) நள மன்னன், இளம் பசுவுடன் செல்லும் ஆனேறுபோன்று மகிழ்ச்சி வீறுகொண்டு சுயம்வர மண்டபத்தினின்றும் புறப்பட்டுச் சென்றான் என்பதாம்.

( வி - ரை.) மல்லல் - வளப்பச் சிறப்பு. பல்வகைப் பொருள்கள் விற்கும் வீதிக்கு அடைமொழி. நாகு - இளமையுள்ள எருமை ஆன் இவைகளின் பெண்ணினத்தைக் குறிக்கும் சொல்.

²‘எருமையும் மரையும் பெற்றமும் நாகே’

என்னும் தொல்காப்பியம் மரபியல் நூற்பாவினால் ‘நாகு’ என்பது, ஆனின் பெண்ணினத்துக்காயிற்று. இதனை,

1. கம்பரா, கைகேசி சூழ் : 108.
2. தொல், மரபியல் : 62.