¹‘தூங்காமை கல்வி துணிவுடைமை இம்மூன்றும்
நீங்கா நிலனாள் பவற்கு’

என்பது வள்ளுவர் மறையாகலான், அரசர்கட்குக் கல்வி சிறந்ததென்பது பெறப்படும். ஆதலான் என்க. (161)

169. செருக்கதிர்வேல் கண்ணியுடன் தேர்வேந்தன் கூட
இருக்கத் தரியேன் இவரைப் - பிரிக்க
உடனாக என்றான் உடனே பிறந்த
விடநாகம் அன்னான் வெகுண்டு.

(இ - ள்.) உடனே - (இவ்வாறு இந்திரன் கூறியதைக் கேட்ட) அப்போதே, பிறந்த விடநாகம் அன்னான் - தான் பிறந்த போதே நஞ்சோடு தோன்றிய நாகப்பாம்பை ஒத்தவனாகிய கலிமகன், வெகுண்டு - சினந்து, செரு கதிர் வேல் கண்ணியுடன் - போரிற் சிறந்த ஒளியெறிக்கின்ற வேல்போன்ற கண்களையுடைய தமயந்தியோடு, தேர்வேந்தன் கூடஇருக்க தரியேன் - தேரினையுடைய நளமன்னன்கூட ஒன்றுபட்டு வாழ்வதற்கு மனம் பொறுக்கேன், இவரைப் பிரிக்க உடன் ஆக என்றான் - இவ்விருவர்களையும் தனித்தனியாக (நான்) பிரித்துவிடுதற்கு நீவிரும் உடன்படுவீராக என்று கூறினான்.

(க - து.) நஞ்சுடன் பிறந்த நாகப்பாம்பை யொத்த கலிமகன், இந்திரன் முதலியோரைப் பார்த்து, ‘நளன், தமயந்தி இருவரும் ஒன்றுபட்டு வாழ்தற்கு நான் மனம் பொறேன் ; ஆதலால், இவர்களைப் பிரித்தற்கு நீவிர் உடன் படுவீராக’ என்று சொன்னான் என்பதாம்.

(வி - ரை.) செரு கதிர் - செருச் செய்கின்ற ஒளியுடைய என வேலினுக்குச் சிறப்புக் கூறியவாறு. வேல் : வெல்லும் தன்மையுடைய தென்பது பொருள். அதுபோன்ற வெம்மையுடைய தெனக் கண்கட்கு அடைமொழி. உடன் : மூன்றாம் வேற்றுமையுருபு, உடனிகழ்ச்சிப் பொருளில் வந்தது. கொடுமையுடையாரைக் குறித்தற்கு நச்சுப் பாம்பை உவமை கூறுவது மரபு. அந்த முறையில், நல்லாரென்னான் ; தீயோரென்னான் ; கற்றோர்

1. திருக்குறள் : 383.