208. கோல நிறம்விளர்ப்பக் கொங்கை முகங்கருக
நீல நிறமயிர்க்கால் நின்றெறிப்ப - நூலென்னத்
தோன்றாத நுண்மருங்குல் தோன்றச் சுரிகுழலாள்
ஈன்றாள் குழவி இரண்டு.

(இ - ள்.) கோலம் நிறம் விளர்ப்ப - அழகிய உடலின் வண்ணம் வெளுத்த நிறங் காட்டவும், கொங்கை முகம் கருக - கொங்கைக் காம்புகள் கருமை நிறம் பெறவும், மயிர்க்கால் நீல நிறம் நின்று எறிப்ப - மயிர்களின் அடியிடத்தில் நீல நிறமானது நிலைபெற்று ஒளி வீசவும், நூல் என்ன - நூலென்னும்படியான, தோன்றாத நுண்மருங்குல் தோன்ற - (மிக மென்மையானதாகக் கண்களுக்குப்) புலப்படாத நுட்பம் பொருந்திய இடையானது (சிறிது பெருத்துப் பார்ப்பவர் கண்களுக்கு) வெளித்தெரியவும் (கருப்பமுற்று), சுரிகுழலாள் குழவி இரண்டு ஈன்றாள் - சுருண்ட கூந்தலையுடைய தமயந்தியானவள் இரண்டு குழந்தைகளைப் பெற்றாள்.

(க - து.) நளனுக்கும் தமயந்திக்கும் திருமணம் ஆகிப் பன்னிரண்டாண்டுகளுக்குப்பின், தமயந்தி கருவுற்று இரண்டு குழந்தைகளைப் பெற்றாள் என்பதாம்.

(வி - ரை.) கருவுற்ற பெண்களுக்கு உடல் நிறம் வெளுத்தலும், கொங்கைக் கண்கள் மிகக் கருநிறங்கொள்ளலும், இடைபருத்துத் தோன்றலும் இயல்பாகக் கருவுற்றதைக் காட்டும் அறிகுறிகள். அவைகளை முறையே (கோல நிறம்...தோன்ற’ என்ற சொற்களினால் விளக்கினார்.

இவ்வாறே மாயையைக் கருவுற்றகாலத்து, மோகினி யென்பாள்,

¹‘முத்தணி கொங்கை முகங்கள் கறுத்தாள்
மெய்த்திரு மேனி விளர்த்து நரம்பு
பைத்தன மீது பரப்ப இருந்தாள்
பொய்த்துயில் கொண்டு புளிக்கும் உவந்தாள்’

எனப், பிரபுலிங்க லீலையினும் வருதல் காண்க.

1. பிரபு. மாயை உற் : 27.