(இ - ள்.) தாது அவிழ் பூ தாரான் - மகரந்தப் பொடி சிந்துகின்ற மலர்மாலையை அணிந்த நளமன்னன், மாதர் அருகு ஊட்டும் பைங் கிளியும் - பெண்கள் தம் அருகில் (வைத்துக் கொண்டு பாலும் பழமும்) ஊட்டி வளர்க்கின்ற பச்சைநிறக் கிளியும், ஆடல் பருந்தும் - போராடுகின்ற பருந்தும், ஒரு கூட்டில் வாழ - ஒரே கூட்டிற்குள் (பகைமை நீங்கி) வாழும்படி, சீதம் மதிகுடைகீழ் - குளிர்ந்த தண்நிலவுபோன்ற வெண்கொற்றக்குடை நிழலிடத்து, செம்மை அறம் கிடப்ப - சிறந்த அறங்கள்நிலைத்து நிற்க, உலகு தனி காத்தான் - தான் ஆளுகின்ற நாட்டைத் தனக்கு ஒப்பாரும் மிக்காரும் இல்லாமல் ஆண்டுவந்தான்.

(க - து.) நளன், கிளியும் பருந்தும் பகையின்றி ஒரேகூட்டில் வாழுமாறு அறமுறை தவறாமல் அரசாட்சி செய்தான்.

(வி - ரை.) சீதமதி - குளிர்ந்த திங்கள். குடைக்கீழ் - இதிலுள்ள கீழ் என்னுஞ் சொல் அதன் நிழலை உணர்த்திற்று. கிளியும் பருந்தும் ஒரு கூட்டில் வாழ்தலாவது, அவை ஒன்றுக்கொன்று பகைமையுடையன ; இம்மன்னன் ஆட்சிமுறையினால் ஐயறிவுயிரினமான இவைகளே, பகையின்றி வாழ்வதாயின், ஆறறிவு படைத்த மக்களானவர் மனமொத்து வாழ்தல் சொல்லவேண்டா என்னும் குறிப்புத் தோன்றக் கூறியதை நோக்குக. இவ்வாறே இளங்கோவடிகளும் பாண்டிய மன்னர்தம் செங்கோற் சிறப்பைக் கூறப் போந்தகாலை,

¹‘அரவும் சூரும் இரைதேர் முதலையும்
உருமுஞ் சார்ந்தவர்க் குறுகண் செய்யா
செங்கோல் தென்னவர் காக்கும் நாடு’

என அருளியதும், கம்பநாடர் தசரதமன்னன் நெறிதவறா ஆட்சியைச் சிறப்பிக்குங்கால்,

²‘வெள்ளமும் பறவையும் விலங்கும் வேசையர்
உள்ளமும் ஒருவழி ஓட நின்றவன்
தள்ளரும் பெரும்புகழ்த் தசரதன்’

என்று அருளியதும் இதனோடு ஒத்த கருத்தாதலை அறிக. தனிக்காத்தல் - தன்னாவார் பிறரின்றித் தாமே காத்தல் என்பதாம். பசுமை+கிளி - பைங்கிளி எனவந்தது, பண்புப் பெயராகலான் என்க. (19)

1. சிலப்: 13 : 7-9. 2. கம்பராமா, பால, அரசியற்: 6.