ஊறும் நிகழாது,’ நலமே நிகழும் என்பதைத் தெளிவுபடுத்தற்கும் ‘தார் வணிகர் வேந்து’ என்று அடைமொழி புணர்த்துக் கூறினார். வண்டு - வண்டுக் கூட்டம். இங்கு ஒருமைச்சொல், சாதியொருமை. (135)

வணிகன் வினாவிற்குத் தமயந்தி விடை கூறுதல்

314. முன்னை வினையின் வலியான் முடிமன்னன்
என்னைப் பிரிய இருங்கானில் - அன்னவனைக்
காணா தழுகின்றேன் என்றாள் கதிரிமைக்கும்
பூணாரம் பூண்டாள் புலர்ந்து.

(இ - ள்.) கதிர் இமைக்கும் பூண் ஆரம் பூண்டாள் - ஒளி விட்டெறிக்கின்ற அணிகளும் மணி மாலைகளும் அணிந்த தமயந்தியானவள், புலர்ந்து - வாட்டமடைந்து, முன்னை வினையின் வலியான் - நான் முற்பிறப்பிற் செய்த தீவினையின் வலிமையினால், முடிமன்னன் என்னை இருங்கானில் பிரிய - முடியணிந்த வேந்தனான நளன் என்னை இப்பெருங் காட்டில் (தனியே விட்டு விட்டுப்) பிரிந்து செல்ல, அன்னவனைக் காணாது அழுகின்றேன் என்றாள் - அம் மன்னவனைக் காணாமல் (தேடி) அழுது கொண்டிருக்கின்றேன் என்று தமயந்தி கூறினாள்.

(க - து.) வணிகன் கேட்டதற்குத் தமயந்தியானவள், ‘நான் செய்த தீவினைப் பயனால் வேந்தன் இப் பெரிய காட்டில் என்னை விட்டுவிட்டுச் செல்ல, அவ்வேந்தனைக் காணாமல் தேடி அழுகின்றே’னென்று வாட்டங்கொண்டு கூறினாள் என்பதாம்.

(வி - ரை.) முன்னைவினை - முற்பிறப்பில் செய்யப்பட்ட தீவினை. ஒருவர் நல்வினையோ தீவினையோ செய்தால் அவருக்கு அவ் வினை பிற்பிறப்பில் வந்து அதன் பயனைச் செய்தே தீரும் என்பது ஆன்றோர் ஆய்ந்து கண்ட முடிபு.

¹‘ஊழ்வினை உருத்துவந் தூட்டும் என்பதூஉம்
சூழ்வினைச் சிலம்பு காரணமாக’

என்றார் இளங்கோவடிகளும்,

வள்ளுவரும் தம் மறைநூலில்,

1. சிலப், பதிகம் : 57-8.