என்று நம்பியதால், தச என்று எண்ணினான் - (ஒன்றென்று தொடங்கிப்) பத்தென்று எண்ணிக் கணக்கிட்டான், எயிறு வைத்தான் - (உடனே பாம்பரசன்) தன் நச்சு நிறைந்த பல்லை வைத்து (நளன் காலில்) தீண்டினான் ; (கடித்தான்.)

(க - து.) பாம்பரசன் சொன்ன மொழியைக் கலியின் வயப்பட்டதனால் உண்மையென நம்பிய நளன், ஒன்றென்று தொடங்கிப் பத்தென்றெண்ணினான் ; உடனே பாம்பரசன் தன் நச்சுப்பற்களை நளன் கால்களில் வைத்துக் கடித்தான் என்பதாம்.

(வி - ரை.) தீக்கலி: தீங்கலியென எதுகை நோக்கி மெலிந்து நின்றது. செற்ற - கெடுத்த : தன் இயற்கைநிலையை மாற்றிய என்னும் பொருளில் வந்தது. திருமனம் - சிறந்த மனம். அதனையுடைய நளன் எனக் குறிப்புவினையாலணையும் பெயர். தசம் - பத்து. மேற் பாட்டில் அரவரசன் வேண்டியவாறு ஒன்றுமுதல் துவங்கிப் பத்தென்பது வரை எண்ணியதைக் குறித்தது. எயிறு - பல். நஞ்சு நிறைந்தது பாம்பின் பற்கள் ஆனதால், நச்சுப் பல் என்று பொருள் கூறப்பெற்றது. வைத்தான் என்பது கடித்ததைக் குறித்தது. காரணப் பொருள் காரியப் பொருளாக வந்தது.

¹‘கலுழன்மேற் சரணம் வைத்தான்’

என்னும் கம்பர் கருத்தும் இதனோடொப்ப வருதலை ஓர்க. (10)

பாம்பு கடித்ததால் நளனது திருமேனி குறுகுதல்

344. வீமன் மடந்தை விழிமுடியக் கண்டறியா
வாம நெடுந்தோள் வறியோருக் - கேமம்
கொடாதார் அகம்போல் குறுகிற்றே மெய்ம்மை
விடாதான் திருமேனி வெந்து.

(இ - ள்.) மெய்ம்மை விடாதான் திருமேனி வெந்து - உண்மை நெறியைக் கடவாதவனாகிய நளமன்னனுடைய அழகான உடல் (நஞ்சினால்) கருநிறமாக மாறி, வீமன் திருமடந்தை - வீம மன்னனுடைய செல்வ மகளாகிய தமயந்தியினுடைய விழி முடிய கண்டு அறியா வாம நெடும் தோள் - கண்களும் முழுவதும் கண்டு அறியவொண்ணாத (நளனின்) அழகு பொருந்திய

1. கம்பரா, பால, திருவவதார் : 25.