ளென்னும் கொடிகளால் ‘வாராதே’ என்று தடுப்பதுபோற் காட்டிற்றென்று இளங்கோவடிகள் கூறுகின்றார். அத்தொடர்,

¹‘போருழந் தெடுத்த ஆரெயில் நெடுங்கொடி
வாரல்என் பதுபோல் மறித்துக்கை காட்ட’

என்பதாகும். இவ்வாறே கம்பநாடரும் இராமபிரான் மிதிலைமா நகர்க்குச் சீதாதேவியின் திருமணங் காணச்சென்றபோது, நகர்க்கொடிகள் ‘வருக வருக’ என அழைப்பதுபோல் தோன்றுவதாகக் குறிப்பிட்டார் ; அது :

²‘..............தெருநெடுங் கொடிகள் என்னும்
கைகளைவீசி அந்தக் கடிநகர் கமலச் செங்கண்
ஐயனை ஒல்லை வாவென் றழைப்பது போனற்து’

என்பதாம். இவைகளிற் கூறிய தற்குறிப்பேற்ற அணிபோற் கொள்க. (33)

41. என்றும் நுடங்கும் இடைஎன்ப ஏழுலகும்
நின்ற கவிகை நிழல்வேந்தே - ஒன்றி
அறுகால் சிறுபறவை அஞ்சிறகால் வீசம்
சிறுகாற்றுக் காற்றாது தேய்ந்து.

(இ - ள்.) ஏழ் உலகும் நின்ற கவிகை நிழல் வேந்தே - இம்மண்ணுலகின் ஏழு தீவுகளிலும் நிலைபெற்றுள்ள குடை நிழலையுடைய வேந்தே! அறுகால் சிறுபறவை - ஆறுகால்களையுடைய சிறிய பறவைகளாகிய வண்டுகள், ஒன்றி அம் சிறகால் வீசும் - ஒன்றுகூடித் தம் அழகிய சிறகுகளினால் உண்டாக்குகின்ற, சிறு காற்றுக்கு ஆற்றாது - மெல்லிய காற்றுக்கும் பொறாமல், தேய்ந்து என்றும் நுடங்கும் என்ப - மெலிவுற்று எப்போதும் துவளும் என்று கூறுவர்.

(க - து.) தமயந்தியின் இடை, வண்டுகளின் சிறையிலிருந்துவரும் மெல்லிய காற்றையும் பொறுக்கலாற்றாது துவளும் என்பதாம்.

1. சிலப்பதி, 13 : 189-90.
2. கம்பராமா, மிதிலைக் : 1.