குடித்தது ஆண் மான். இக்கருத்தை உள்ளடக்கியதே இதன் கீழ் வருவது. இவைகளோடொத்ததே இவ்வண்டுகளின் அன்பும்.

¹‘சுனைவாய்ச் சிறுநீரை எய்தாதென் றெண்ணிப்
பிணைமான் இனிதுண்ண வேண்டிக் - கலைமாத்தன்
கள்ளத்தின் ஊச்சும் சுரமென்பர் காதலர்
உள்ளம் படர்ந்த நெறி’

இந்நிலை கண்டே நளன், தான் காதலிக்கிழைத்த தீமையெனக் கருதினான். தான் பிரிந்துவந்த நிலையையெனக் கொள்க. (20)

354. காதலியைக் காரிருளில் கானகத்தே கைவிட்ட
பாதகனைப் பார்க்கப் படாதென்றோ - நாதம்
அளிக்கின்ற ஆழிவாய் ஆங்கலவ ஓடி
ஒளிக்கின்ற தென்னோ உரை.

(இ - ள்.) (நளன் அங்கு வந்த நண்டொன்றை நோக்கி) அலவ - ஓ நண்டே ! நாதம் அளிக்கின்ற ஆழிவாய் ஆங்கு ஓடி ஒளிக்கின்றது - பேரோசை தரும் அலைகளையுடைய கடற்கரை ஓரத்தில் நீ சென்று உன் வளைக்குள் புகுந்து ஒளித்துக்கொள்ளுதல், காதலியை கார் இருளில் கானகத்தே கைவிட்ட - தன் மனைவியைக் கரிய நள்ளிரவில் கடிய காட்டில் கைவிட்டுப்பிரிந்து வந்த, பாதகனை பார்க்கப்படாது என்றோ - இப்பாவியைப் பார்த்தல் தகாதென்ற காரணமோ ? என்னோ உரை - வேறு என்ன காரணமோ ? (நான் அறியக்)கூறு.

(க - து.)நளன் அங்கோடிய நண்டொன்றைப் பார்த்து, ‘நண்டே ! என்னைக்கண்டு உன் வளைக்குள் ஒளிந்துகொள்கின்றாயே, காதலியை நடு இரவில் கொடிய காட்டில் விட்டுப்பிரிந்து வந்த இப்பாவியைப் பார்க்கக் கூடாதென்றா ? வேறு என்ன காரணமோ ? சொல்லு’ என்றான் என்பதாம்.

(வி - ரை.) ‘நின் பிரிவினும் சுடுமோ கொடுங்காடு’ என்று கூறிக் கார்முகில் வண்ணனைத் தொடர்ந்துவந்த மிதிலைப் பொன்னையொப்பத் தன் காதற் கணவனைத் தொடர்ந்துவந்த

1. ஐந்திணை ஐம்பது : 38.