தோய்க்கும் : தோயும். தன்வினை; ஈண்டுப்பிறவினை வாய்பாட்டாற் கூறப்பட்டது.

சேக்கிழாரும். இருதுபன்னன் வெற்றிச் சிறப்பும், தறுகண்மையும் வேலின்மேல் வைத்துக் கூறப்பட்டது. நறவம் - மணம். மலர் மாலைக்கு அடைமொழி. தேரோட்டம் தொழிலில் வல்லவனாக நளமன்னன் வாகுகனென்னும் பெயருடன் சென்று தன் தன்வரவு கூறினானாகலான் ‘தேர் வேந்தன்’ என்றார். (25)

359. அம்மொழியைத் தூதர் அரசற் கறிவிக்கச்
செம்மொழியாத் தேர்ந்ததனைச் சிந்தித்தே - இம்மொழிக்குத்
தக்கானை இங்கே தருமின் எனஉரைப்ப
மிக்கானும் சென்மறான் விரைந்து.

(இ - ள்.) அம் மொழியை தூதர் அரசற்கு அறிவிக்க - (இவ்வாறு நளன்) கூறியவற்றைச் சென்று தூதர்கள் இருது பன்ன மன்னனுக்கு அறிவிக்க, அதனை சிந்தித்து செம்மொழியா தேர்ந்து - அவன் அதனைக் கேட்டு எண்ணி உண்மை மொழியென்று தெளிந்து, இம்மொழிக்கு தக்கானை இங்கே தருமின் என உரைப்ப - நீர் கூறிய இச் சொற்களுக்கு ஏற்ற தகுதியுள்ள அவனை இங்கு அழைத்துக்கொண்டு வருக என்று சொல்ல, விரைந்து மிக்கானும் சென்றான் - (தூதுவர் வந்து அழைக்க) மேன்மை மிக்கவனான நளனும் விரைந்து (அவனிடம் உள்ளே) போனான்.

(க - து.)நளன் கூறியவற்றைத் தூதர்கள் தம் அரசனுக்குச் சொன்னார்கள்; அதைக் கேட்ட மன்னவன் அதனை நன்கு எண்ணித் தெளிந்து ‘நீர் கூறியவனை அழைத்து வருக’ என்றான். அவர்கள் அழைக்க நளன் விரைந்து இருதுபன்னனிடம் சென்றான் என்பதாம்.

(வி - ரை.) செம்மொழி - உண்மை மொழி. அல்லது உண்மையான மொழி யென்பதைத் தான் குறிப்பறிதலில் வல்லனாதலால் அச் சொற்களை நன்கு ஆராய்ந்து தெளிந்தான் என்க. ஒருவன் தன்னைப்பற்றி வல்லவன் என்று தானாகக் கூறுவதானால்