380. ஏரடிப்பார் கோலெடுப்ப இன்தேன்தொடை பீறிக்
காரடுத்த சோலைக் கடல்நாடன் - தேரடுத்த
மாத்தொழிலும் இத்தொழிலும் மாற்றுதியோ என்றுரைத்தான்
தேர்த்தொழிலின் மிக்கானைத் தேர்ந்து.

(இ - ள்.) ஏர் அடிப்பார் கோல் எடுப்ப - உழவு எருதுகளை ஓட்டுகின்ற உழவர்கள் தங் கைகளிலுள்ள தாற்றுக்கோலை ஓச்சுதலால், இன்தேன் தொடைபீறி-(பக்கத்திலிருக்கின்ற மரங்கிளையில் உள்ள) இனிமையானதேன்இறால் கிழிபட்டுத் தேன் ஒழுகுகின்ற, கார் அடுத்த சோலை கடல்நாடன் - மேகங்கள் தங்குகின்ற சோலைகள் சூழ்ந்த கடற்கரை நாடனாகிய இருதுபன்னன், தேர்த்தொழிலின் மிக்கானை தேர்ந்து - தேரோட்டுந்தொழிலிற் சிறந்த வாகுகனாகிய நளனை நன்கு மதித்து, தேர் அடுத்த மா தொழிலும் - தேரிற் பூட்டிய குதிரைகளை ஓட்டுகின்ற தொழில் முறையையும், இத்தொழிலும் மாற்றுதியோ என்று உரைத்தான் - இம்மரத்தில் காயெண்ணுகின்ற இத்தொழிலையும் மாற்றிக்கொள்வாயோ என்று கேட்டான். (அஃதாவது இருவரும் அவ்வத்தொழிலைக் கற்றுக்கொள்வோம் என்றபடி.)

(க - து.)இருதுபன்னன் நளனை நோக்கி, ‘தேர்க் குதிரைகளை விரைவாக ஓட்டுகின்ற உன் தொழிலையும் காய்களை எண்ணிக்கணக்கிடும் என் தொழிலையும் மாற்றிக் கொள்வாயா?’ என்று கேட்டான்.

(வி - ரை.) ஏர் - ஏருக்குரிய எருதுக்காதலால் ஆகுபெயர். கோல் - தாற்றுக்கோல். எடுப்ப - ஓச்சு. தொடை - தேனிறால். கார் - மேகம். நிலவளத்தால் சோலைகள் மேகமண்டலம் வரை வளர்ந்திருத்தலைக் குறித்தது. கடல் - கடற்கரை. தேரடுத்தமா - தேரிற் பூட்டிய குதிரை. இத்தொழில் என்னும் அண்மைச் சுட்டு, எண்ணிக்கணக்கிடுதலை உணர்த்திற்று. மாற்றுதி: முன்னிலை ஏவல் ஒருமை. இருதுபன்னன் வாகுகனை நோக்கி அவன் தேர்த்தொழிலுக்கு வியந்து, நீ
எனக்கு இத்தேரோட்டுகின்ற தொழிலைக் கற்றுக்கொடு ; நான் உனக்கு இக்கணக்கு முறையைக் கற்றுக்கொடுக்கின்றேன். இருவரும் இத்தொழில்களிற் பயிற்சி பெற்றவராக விளங்குவோம் என்பது குறிப்பு. மாத் தொழில்-குதிரைகளின் மனநிலை தெரிந்து அவைகளைத் தேர்ந்து தேரிற்பூட்டி ஓட்டுகின்ற அரிய வித்தை. இத்தொழில் - இருதுபன்னன் தான்கற்ற கணக்கு வித்தை. (47)