தவறாமல் காக்கும் முறையுடையான் என்பதைக் குடைமேல் ஏற்றிக் கூறினார். ‘ஒடுங்கிடையாள்’ சிறிய இடையினை யுடையாள் - நல்லிலக்கணம்வாய்ந்த பெண்களுக்கு நெற்றியும் அடியும் இடையும் சிறுத்திருப்பதே இயற்கையாகலான், அவ்விலக்கணம் யாவும் முற்றும் நிரம்பியவள் என்பதை உணர்த்தியவாறாம்.

¹‘அகலல்குல் தோள்கண்ணென மூவழிப் பெருகி
நுதலடி நுசுப்பென மூவழிச் சிறுகி’

என்றார் கலித்தொகையினும். (39)

47. இவ்வளவிற் செல்லுங்கொல் இவ்வளவிற் காணுங்கொல்
இவ்வளவிற் காதல் இயம்புங்கொல் - இவ்வளவில்
மீளுங்கொல் என்றுரையா விம்மினான் மும்மதம்நின்
றாளுங்கொல் யானை அரசு.

(இ - ள்.) மும்மதம் நின்று - மூன்றுவகை மதங்களும் மிகுந்து, ஆளும் கொல் யானை அரசு - (அதனால்) அவைகளின் வழிப்பட்டு நிற்கும் கொலைத்தொழில் உடைய யானையையுடைய நளவேந்தன், இ அளவில் செல்லுங்கொல் - (அன்னமானது) இத்தனைநேரம் (குண்டினபுரம்) சென்றிருக்குமோ, இ அளவில் காணும்கொல் - இத்தனை நேரம் (தமயந்தியைக்) கண்டிருக்குமோ, இ அளவில் காதல் இயம்பும்கொல் - இத்தனை நேரத்துக்குள், (எனக்கு அவள்பாலுள்ள) மெய்யன்பை உரைத்திருக்குமோ, இ அளவில் மீளும் கொல் - இத்தனைநேரம் (அங்கிருந்து) திரும்பி வந்துகொண்டிருக்குமோ, என்று உரையாவிம்மினான் - என்று சொல்லிச் சொல்லிப் பெருமூச்சுவிட்டு ஏங்கிக்கொண்டிருந்தான்.

(க - து.) நளமன்னனானவன், இத்தனைநேரம் குண்டினபுரத்துக்கு அன்னம் சென்றிருக்குமோ என்பது முதலாகச் சொல்லி வருந்திக்கொண்டிருந்தான் என்பதாம்.

(வி - ரை.) ‘இவ்வளவிற் செல்லுங்கொல்’ முதலியன, நளமன்னன் காதல் மிகுதியால் தவித்து நிற்கும் தன்மையை

1. கலி : 108.