உணர்த்துகின்றன. இது, கைக்களையின்பாற்படும். ¹‘கைக்கிளையாவது ஒருமருங்குபற்றிய கேண்மை’ என்பர், நச்சினார்க்கினியர். அஃதாவது, காதல்கொண்ட ஆடவரோ பெண்டிரோ தாம் காதலித்தாரை நினைந்து வருந்தும் நிலைமை. ‘இதனைக் ²‘கைக்கிளை என்பது ஒருதலைக் காமம்’ என்றார், அகப்பொருள்விளக்க ஆசிரியரான நம்பியார். இதுமுதல் ஒருதலைக்காமம்பற்றி, அஃதாவது நளன் தமயந்தியிடத்துக்கொண்ட காதல் மிகுதி பற்றி ஐந்து பாடல்களால் குறிப்பிடுகின்றார். மும்மதம் கன்னம் (காது) கபோலம் (தலை : மத்தகம்) பீசம் (ஆண்குறி) இவைகளிடத்துத் தோன்றி ஒழுகும் ஊற்றுநீர். இது ஆண்யானைகளுக்கு உண்டாவதியல்பு. இம்மதங்களினால் யானை தன் அறிவு திரிந்து செருக்குற்று கண்டவற்றையெல்லாம் அழிக்கும் நீர்மையுடைய தாகலான், ‘ மும்மதநின்று ஆளும் கொல்யானை ’ என்றார். இத்தகைய ஆற்றல்மிக்க யானையைுடையான், தன் ஆற்றல் அழிந்து காதல் வயத்தனாய்க் கலக்கமுற்றான் என்பது குறிப்பு. அரசு: அரசுக்குரிய தன்மையுடையவனைக் குறித்தலால் பண்பு ஆகுபெயர். கொல் ஐயமும் அவலமும்கொண்ட இடைச்சொல். இது நான்கிடத்தும் வந்து அரசன் வருந்தும் தன்மையை விளக்கிநின்றது. ³‘குளித்து மணற்கொண்ட கல்லா இளமை, அளிதோ தானே யாண்டுண்டு கொல்லோ’ என்னும் புறநானூற்றில் கொல் அவலப் பொருள்தருதலை ஓர்க. (40)

48. சேவல் குயிற்பெடைக்குப் பேசும் சிறுகுரல்கேட்
டாவி உருகி அழிந்திட்டான் - பூவின்
இடை அன்னம் செங்கால் இளஅன்னம் சொன்ன
நடை அன்னம் தன்பால் நயந்து.

(இ - ள்.) பூவின் இடை அன்னம் - தாமரைமலரில் வாழ்கின்றதும், செங்கால் இள அன்னம் - சிவந்தகால்களும் இளைமையும் உடையதான அன்னப்பறவையால், சொன்ன - சொல்லப்பட்ட, நடை அன்னம் தன்பால் நயந்து - அன்னம்போன்ற நடையழகுள்ள தமயந்தியின்மீது காதல்கொண்டு, சேவல் குயில்-ஆண்குயிலானது, பெடைக்கு பேசும் சிறுகுரல் கேட்டு - பெட்டைக்குயிலுடன் பேசுகின்ற இன்குரலைக் காதாற்கேட்டு, ஆவி உருகி அழிந்திட்டான் - உயிர் தளர்வுற்று அறிவு வேறுபட்டான்.

1. தொல். அகத்தினை : 1. 2. நம்பி அகப்: 2.
3. புறம்: 243.