(இ - ள்.) முற்று ஆம்பல் தேன்நீர் அளித்து - மலரும் பருவ அல்லி அரும்புகள் மலர்ந்து தேனாகிய நீரை ஒழுக்கி, அருகு செம் நெல் கதிர்விளைக்கும் - தன் பக்கத்திலுள்ள செந்நெற் பயிர்களை வளர்த்து கதிர்கள் கொண்டு விளையச்செய்கின்ற, மாநீர் நிடதத்தார் மன் - மிக்க நீர்வளம் பொருந்திய நிடதநாட்டுக்கு அரசனான நளன், வில்தானை முன்செல்ல வேல்வேந்தர் பின்செல்ல - விற்படை கொண்ட படைவீரர்கள் தனக்கு முன்புறமாகப் போகவும் வேற்படை ஏந்திய அரசர்கள் தனக்குப் பின்புறமாகத் (தொடர்ந்து) வரவும், பொன் தேர்மேல் தேவியொடும் போயினான் - பொன்னாற் செய்த தேரின்மேலேறிக்கொண்டு தன் மனையாளோடும் (தன் நகர்நோக்கிப்) புறப்பட்டுச் சென்றான்.

(க - து.) நளமன்னனானவன், தனக்கு முன்பு வில் வீரர்கள் போகவும், தனக்குப் பின்பு வேல்வேந்தர்கள் தொடர்ந்துவரவும், பொன்னானியன்ற தேரில் தன் மனையாளோடும் ஏறிக்கொண்டு தன் நகர்நோக்கிப் புறப்பட்டுச் சென்றான் என்பதாம்.

(வி - ரை.) வில்+தானை - விற்றானையெனப் புணர்ந்தது. விகாரப் புணர்ச்சி. இது உருபும் பயனும் உடன் தொக்கதொகை. எறிபடையினும் விடுபடை சிறந்ததாகலின், அதனை முற்கூறினார். அரசர்க்குரிய உறுப்புக்கள் ஆறனுள், படையே முதன்மைமயானது, அரசர்கட்குப் பாதுகாப்பாக இருத்தலின். வள்ளுவரும் அரசர்கட்கு வகுத்த உறுப்பு ஆறனுள்,

¹‘படைகுடி கூழமைச்சு நட்பரண் ஆறும்
உடையான் அரசருள் ஏறு’

என, முதற்கண் படையைவைத் தோதினமையும் அறிக. அரசர்கள் புறப்படுங்கால் அவர்தம் உரிமைச் சின்னங்களை அனுப்பிப் பின்னரே செல்லுதல் அரசர் மரபாகக்கொள்வது பண்டுதொட்ட மரபு.

²‘அரசர்தம் உரிமை போக்கி அதன்பின்னே செல்வர்’

எனத் திருத்தக்கதேவர் சிந்தாமணியினும்,

³‘சீரை சுற்றித் திருமகள் பின்செல

மூரி விற்கை இளையவன் முன்செல

1. திருக்குறள் : 381. 2. சீவகசிந்,
3. கம்பராமா, நகர்நீங்கு : 234.
ந. - 34.