கமலம் - தாமரை; அதன் நூலைக் குறித்தலால் முதலாகுபெயர். தொடை - தொடுக்கப்படுவது. தேன் - வண்டு. தேனை உண்ணுதல்பற்றி வந்த பெயர். ஆதலால் ஆகுபெயர்.

நளன் வரலாற்றில் இந்திரன் முதலிய தேவர்களும், கலிபுருடனும், கார்க்கோடனும் தொடர்பு கொண்டிருப்பதால், ‘தெய்வத்திருக்கதை’ என்றார். அன்றியும் நளவேந்தன், மறங்கடிந்து அறத்தாற்றில் நின்று உலகத்தைக்காத்த முடியுடைப் பேரரசனாகலான்,

¹‘முறைசெய்து காப்பாற்றும் மன்னவன் மக்கட்கு
இறையென்று வைக்கப் படும்’

என்று தமிழ்மறையும்,

²‘திருவுடை மன்னரைக் காணின்
திருமாலைக் கண்டேனே என்னும்’

என்று ஆழ்வாரும் குறித்தலான், தெய்வத் தன்மையுடைய கதையென்று கொள்ளலுமாம்.

எத்துணை ஆற்றல் படைத்தவராயினும் பணிவு வேண்டுமாதலால் ஈங்கே அறிவுடைச் சான்றோர்க்கு அடக்கம் கூறினார். என்னை?

³‘எல்லார்க்கும் நன்றாம் பணிதல்’ என்பது திருவள்ளுவர் செம்மொழி. (6)

7. பாரார் நிடத பதிநளன்சீர் வெண்பால்
பேரார் புகழேந்தி பேசினான் - தாரார்
செழியனையும் சென்னியையும் சேரத் திறைகொள்
மொழியின் சுவையே முதிர்ந்து.

(இ - ள்.) தார் ஆர் செழியனையும் சென்னியையும் - மாலையையணிந்த பாண்டியனையும் சோழனையும், சேர திறைகொள் - ஒருங்கே தமக்கு அடக்கமாக்கிக் கொள்ளும், மொழியின் சுவையே

--------------------------
1. திருக் : 388. 2. திருவாய்மொழி, 34: 8.
3. திருக் : 125.