மூடனை இணைஇலாச் சேடன் என்றும் - எழுதவும் படிக்கவும் வழியறியாத
பேதையை ஒப்பற்ற ஆதிசேடன் என்றும், ஈவது இல்லாத கனலோபியைச்
சபையதனில் இணைஇலாக் கர்ணன் என்றும் - கொடுத்தறியாத பெரிய
அழுக்கனை அவையிலே ஒப்பற்ற கொடையிற் சிறந்த கர்ணன் என்றும்,
அழகு அற்ற வெகு கோரரூபத்தை உடையோனை அதிவடிவ மாரன்
என்றும் - அழகு இல்லாத மிகுந்த அருவருப்பான உருவமுடையவனைப்
பேரழகுடைய காமன் என்றும், ஆயுதம் எடுக்கவும் தெரியாத பேடிதனை
ஆண்மைமிகு விசயன் என்றும் - படையேந்தவும் பழகாத
ஆண்மையற்றவனை வீரத்திற் சிற்ந்த விசயன் என்றும், முழுவதும்
பொய்சொல்லி அலைகின்ற வஞ்சகனை மொழி அரிச்சந்திரன் என்றும் -
முற்றிலும் பொய்புகன்று திரியும் வஞ்சகனைச் சொல்லில் அரிச்சந்திரன்
என்றும், இவ்வணம் மூதுலகில் கவிராசர் சொல்லியே முறையின்றி ஏற்பது
என்னோ - இவ்வாறு பழைமையான இந்த உலகத்திற் பாவலர்கள் புகன்று
தகுதியின்றி இரப்பது என்ன காரணமோ?

     (வி-ரை.) ஆதிசேடன் கல்வியிற் சிறந்தவன். முதுமை + உலகு -
மூதுலகு.

     (க-து.) முற்காலத்தில் வறுமை மிகவும் கொடியதாகையாற் புலவர்கள்
ஒருவனுக்கு ‘இல்லாத சொல்லிப்' புகழ்தல் இயற்கையாக இருந்தது.