பொழுதேனும் அன்பு மேலீட்டால் கண்ணீர் வார்தலும் உடல் நடுங்கலும் உற்றறியேன்.

     "என்னை . . . எதிர்த்த" - அடியேனை ஆட்கொண்டருளும் ஒப்பில்லாதமுதல்வனே! எளியனும் தனியனுமாகிய ஒருவனாம் எனக்கு இருவினையும், முக்குணமும், நான்கு கரணமும், துன்பத்தொடக்கினைவிடாது செய்து வரும் ஐம்புலன்களும், காமம் முதலாகச் சொல்லப்படும் ஆறுபகையும், வரவரவும், அறிவிலியாகிய எளியேனுக்கு எட்டு மதங்களும் மட்டின்றி வந்து எதிர்த்தன.

     (வி - ம்.) இருவினை - நல்வினை, தீவினை. முக்குணம்: அமைதி ஆட்சி, அழுந்தல். கரணம் நான்கு: நாட்டம், மனம், எழுச்சி, இறுப்பு. ஐம்புலன்: சுவை, ஒளி, ஊறு, ஓசை, நாற்றம். காமாதி ஆறு: செருக்கு, சினம், சிறுமை, இவறல், மாண்பிறந்த மானம், மாணாவுவகை. மதம் எட்டு: குலம், உருவம், இளமை, கல்வி, செல்வம், தற்பெருமை, உதவி, இயல்பு, (இவற்றால் தனக்கு நிகராவார் எவரும் இலரெனத் தன்னையே மதித்துச் செருக்குறுதல்.) அமைதி - சாத்துவிகம், ஆட்சி - இராசதம். அழுந்தல் - தாமதம். நாட்டம் - சிந்தை. எழுச்சி - ஆங்காரம். இறுப்பு - புத்தி. அகப்பகை ஆறு : காமம், வெகுளி, கடும்பற்றுள்ளம், மானம், உவகை, மதம்.

     "நவ . . . வடிவமன்றே" - (தில்லைத் திருச்சிற்றம்பலம் சிவனார் நடிக்கும் திருவருட்பரவெளி), சிவபெருமான் உலகுய்ய உள்ளத்தால் உஞற்றியருளும் திருக்கூத்துத் திருவடிவம் ஒன்பது வகையாகும். அதற்கு இடம் பொன்னம்பலமாகும். வடிவம் ஒன்பது: 1. அத்தன் 2. அன்னை 3. ஓசை 4. எழுத்து 5. அருளோன் 6. ஆசான் 7. அரன் 8. அரி, 9. அயன்) (சிவம், சத்தி, நாதம், விந்து, சதாசிவம், ஈசுரம், அரன், அரி, அயன்) இவ்வுண்மை வருமாறு :

	"சிவஞ்சத்தி நாதம் விந்து சதாசிவன் திகழும் ஈசன்
	உவந்தருள் உருத்தி ரன்தான் மாலயன் ஒன்றின் ஒன்றாய்ப்
	பவந்தரும் அருவம் நாலிங் குருவநால் உபயம் ஒன்றா
	நவந்தரு பேதம் ஏக நாதனே நடிப்பன் என்பர்."
	- சிவஞானசித்தியார், 2. 4 - 2.

(2)

வடிவனைத்துந் தந்தவடி வில்லாச் சுத்த

வான்பொருளே எளியனேன் மனமா மாயைக்

குடிகெடுக்கத் துசங்கட்டிக் கொண்ட மோன

குருவேஎன் தெய்வமே கோதி லாத

படியெனக்கா னந்தவெள்ளம் வந்து தேக்கும்

படியெனக்குன் திருக்கருணை பற்று மாறே

அடியெடுத்தென் முடியிலின்னம் வைக்க வேண்டும்

அடிமுடியொன் றில்லாத அகண்ட வாழ்வே.