(வி - ம்.) சிவபெருமானின் திருவிளையாடல்1 என்பது பள்ளி வகுப்புப் போலவும், பயிற்சித்துறைகள் போலவும், மாந்தர் வளர்ச்சி போலவும் மேன்மேல் உயர்ந்துவர அவ்வந்நிலைகளுக்கேற்றவாறு நூலும், கருவியும், நுண்ணறிவும் பொருந்தத்துணைநின்றருள்வது.
(25)
அம்மாஈ ததிசயந்தான் அன்றோ அன்றோ | அண்டநிலை யாக்கிஎன்னை அறிவாம் வண்ணஞ் | சும்மாவே இருக்கவைத்தாய் ஐயா ஆங்கே | சுகமயமாய் இருப்பதல்லாற் சொல்வான் என்னே. |
(பொ - ள்.) வியப்பாகும் : இது வியப்பே, வியப்பே அல்லவோ அகன்ற நிலையாகிய வியாபகத்தினுள் அடங்கு நிலையாகிய வியாப்பியமாக்கி அடியேனை அறிவாகும் வண்ணம் சிவனே என்றிருக்க வைத்தருளினை; ஐயனே. அங்கே இறவாப் பேரின்ப எழில்வடிவாக இருப்பதல்லாமல் வேறு சொல்லுவதற்கு என்னிருக்கிறது? (ஏதும் இல்லை யென்பதாம்.) சும்மா இருத்தல் - சிவனே என்றழுந்தியிருத்தல்.
(26)
என்னேநான் பிறந்துழல வந்த வாறிங்(கு) | எனக்கெனஓர் செயலிலையே ஏழை யேன்பால் | முன்னேசெய் வினையெனவும் பின்னே வந்து | மூளும்வினை யெனவும்வர முறையேன் எந்தாய். |
(பொ - ள்.) இவ்விடத்து எளியேன் பிறந்து இறந்து உழலுமாறு வந்த முறை யாது? (உயிரையன்றி உடலுக்குச் செயலில்லாமை போன்று உயிர்க்குயிராகிய தேவரீரையன்றி) எனக்கெனவோர் செயலில்லையே2 ஏழையேன்பால் முன்னே செய்வினையெனவும், மூளும் பின்னைவினையெனவும் வருதற்கு எந்தையே! முறை யாது?
(வி - ம்.) முன்வினையென்பது ஊழ், பின்னே வந்து மூளும்வினை ஆகாமியம். இவை ஏன்றவினை யெனவும் ஏறுவினை எனவும் கூறப்படும்.
(27)
தாயான தண்ணருளை நிரம்ப வைத்துத் | தமியேனைப் புரவாமல் தள்ளித் தள்ளிப் | போயான தென்கொல்ஐயா ஏக தேசம் | பூரணத்துக் குண்டோதான் புகலல் வேண்டும். |
(பொ - ள்.) அடியேனுக்குத் தாயாகிய தண்ணருளை நிறைய வைத்துத் தமியனாகிய எளியேனைப் பாதுகாவாமல் நீக்கி நீக்கி வைத்ததனால் உண்டான பயன் யாது? ஐயனே எங்கும் அகல்நிறைவாய் நின்றருளும் நின்னியல்புக்கு ஒருபுடையென்னும் ஏகதேசமுண்டோ? திருவாய்மலர்ந்தருள்வாயாக. தமி - தனி. ஏகதேசம் - வரையறை.
1. | 'யாதொரு' சிவஞானசித்தியார், 2 - 2. 22. |
2. | 'சலமிலனாய்' " 10, 2 - 2. |