தேடாத தேட்டினரே செங்கைத் துலாக்கோல்போல்

வாடாச் சமனிலையில் வாழ்வார் பராபரமே.

     (பொ - ள்) எளிதில் எல்லாராலும் தேடமுடியாத அன்பராயினார்க்குத் திருவருளால் வந்து பொருந்திய திருவடிச் செல்வத்தையுடையவரே, வணிகர்தம் கோடாத செங்கையில் தாங்கும் துலாக்கோல் போல் பெருக்கத்து மகிழாமலும் சுருக்கத்து வருந்தாமலும் சமனிலையாக நிற்பர். அவர்தம் வாழ்வே அருள்வாழ்வாகும்.

(234)

நீராய்க் கசிந்துருகி நெட்டுயிர்த்து நின்றேனைப்

பாராத தென்னோ பகராய் பராபரமே.

     (பொ - ள்) நின்திருவடியினைக் காணப் பெறாது உள்ளம் கசிந்து நீராய் உருகிப், பெருமூச்சுவிட்டு நின்ற அடியேனைத் தேவரீர் திருக்கடைக்கண் பாராத தென்னையோ? திருவாய்மலர்ந்தருள்வீராக.

(235)

உள்ளபொருள் ஆவி உடல்மூன்றும் அன்றேதான்

கொள்ளைகொண்ட நீயென் குறைதீர் பராபரமே.

     (பொ - ள்) தேவரீரால் கொடுக்கப்பட்டு அடியேன்பால் இரவலாக நின்றுள்ள "ஆவியும் உடலும் உடமையும்"¹ ஆகிய மூன்றும் தேவரீர் மோன குருவாக எழுந்தருளிய காலத்தே அடியேன் ஒப்புவிக்க ஏற்றுக்கொண்டருளினீர். அத்தகைய நீர் எளியேன் குறைகளைத் தீர்த்தருளுதல் வேண்டும்.

(236)

ஆழ்ந்தாயே யிவ்வுலகில் அல்லலெல்லாந் தீர்ந்தருளால்

வாழ்ந்தாயே என்றனைநீ வாழி பராபரமே.

     (பொ - ள்) (நாயனீர் சிவகுருவாய் எழுந்தருளிவந்து அடியேனை ஆட்கொண்டருளிய காலத்தில்) எளியேனை நோக்கி நீ இத்தனை காலமும் இவ்வுலக மயக்கில் சிக்கி ஆழ்ந்துழன்றனையே, அத்துணை அல்லல் அனைத்தும் திருவருளால் நீங்கி வாழ்ந்தனையே என்று நீ திருவாய் மலர்ந்தருளினை; நின்திருவடி வாழ்க.

(237)

தாரா அருளையெல்லாந் தந்தெனையும் நின்னருளின்

வாராயோ என்றனைநீ வாழி பராபரமே.

     (பொ - ள்) அந்நாளில் (தகுதியில்லாத எளியேனுக்குத்) தருதற்குப் பொருத்தமில்லாத நின்திருவருள் முழுவதையுந் தந்து அடியேனையும் நின்திருவருளால் வருவாயாகவென்று கூவி அழைத்தருளினை. அங்ஙனம் திருவாய் மலர்ந்தருளிய நாயனீர் வாழ்க.

     (வி - ம்.) முதற்கண் திருவருளைத் தருதல் ஒருவன் தூய்மை எய்துதற் பொருட்டு அவனைத் திருத்தநீரின்கண் மூழ்குவித்த லோடொக்கும். பின்னர்த் திருவருளில் வருமாறழைத்தல் தூய்மை

1.	'அன்றே என்றன்'. 8. குழைத்தபத்து. 7.