மனக்கலக்கம் உடையவர்கட்கு எல்லா இடங்களிலும் பேயுருவே தோன்றும். தெளிவில்லாத கண்ணாடி அழகிற் சிறந்த முகத்தையும் அழகிற் குறைந்த முகமாக வேறுபடக் காட்டும்.இவைபோன்று அறிவுக் குறையால் தீமைசெய்யாதாரும் தீயர் போல் காணப்படுவர். அறமும் தீமைபோல் காணப்படும். அவர் தீமைசெய்வதற்கு மயக்கத்தால் பல காரணங்களுண்டு. இவைகளை எண்ணிப் பிழையைப் பொறுப்பர் பெரியோர்.

இன்சொல், உருண்டை உலகத்து வழங்கும் திசை எட்டிலும் புகழை அளவில்லாமல் நிறைவிக்கும். கொல்ல வருகின்ற தீயவரையும் நீக்கி இணங்கச்செய்யும். இன்சொல் சொல்லுவதால் இழப்பு ஏதும் இன்று. மக்களை எல்லாம் நண்பராக்கி விருப்பகலாப் பிணைப்பை உதவும்.