நிழலும் அளவுக்கு மிஞ்சிய நீருங்கொண்ட நெற்பயிர் அழியும். அளவுக்கு மிஞ்சியுண்ணும் அமிழ்தமும் நஞ்சாகும். சிற்றின்பமும் வரம்பு மீறினால் துன்பமாம். (இவைபோல்) அளவுக்கு மிஞ்சி உண்ணும் ஊண் சுரம், நோய், அறியாமை, சுறுசுறுப்பின்மை, பழி முதலிய தீமைகளையெல்லாம் விருப்புடன் அழைக்கும் தூதாகும்.

அளவுக்கு மிஞ்சிய நீரைக்கொண்ட குளம் நிரம்பி வழிந்து முன் உள்ள நீரையும் இழக்கும். இந்த முறைமைபோல் பெருவயிற்றின் பள்ளம் மேடாக விலாப்புடைக்க உண்ணும் ஊண் உடல் வளமாகிய வலிமையைப் போக்கிவிடும். மதிக்கத் தகுந்த அளவு உணவாகிய சிற்றுணவு தூய குருதியாக மாறி வற்றிய உடல் எங்கும் பரவி வலிமையைத் தரும்.