பொறுமைமிக்க ஏழைபோன்று முழுமுதற்கடவுள், கோலங்கொண்டு எழுந்தருள்வன். ஒன்றுவேண்டித் தருக என்று கூறிக் கை ஏந்துவன். அக் கை நமக்கு வேண்டிய பேரின்ப வீட்டைப் பெற்றுக்கொள்க, என்று ஏந்திய கை ஆகும். அக் கையில் விருப்புடன் கொடுத்த பொருள், அவ்விட்டுக்கு நல்கிய விலைப்பொருளாகும். அன்னவர்களை வெறுத்துச் சினந்து இல்லையென்று கூறுவோர், வீடு வேண்டாமென்று மனமாரச் சொல்லும் வீணரேயாவர்.

இரந்துண்போரை இகழும் அறிவிற் குறைந்தவர்களே! உங்களுக்கு ஒன்று சொல்லுகின்றேன், கேளுங்கள். அவர்கள் நிரயம் வீடு என்னும்கிடையாப் பெரும் பொருள்களை விற்கும் செட்டிகளாவர். அவர்க்கு வேண்டுவன கொடுத்துப் பாதுகாக்கும் நல்ல தன்மையுடையார்க்கு வீட்டினை நல்குவர். இயல்வது கரக்கும் தீத்தன்மையுடையார்க்கு நிரயத்தைக் கொடுக்கின்றனர். அதனால், அவர் நிலைமையைப்பற்றி என்ன சொல்லுவது? (மிகப் பெரியவரென்க)

பிறர் கூறும் இசையையோ, வேறு பல உதவியையோ நாடி நன்மை செய்வோர் அறவோர் ஆகார்; அழியா ஆண்டவன்